Առանձին երկրներ կարող են Բելառուսի դեմ ազգային պատժամիջոցներ սահմանել․ Գիտանաս Նաուսեդա
Բելառուսի դեմ Եվրամիության պատժամիջոցները պետք է մեծապես ուղղված լինեն կոնկրետ պաշտոնատար անձանց, այլ ոչ թե տնտեսությանը, ասում է Լիտվայի նախագահ Գիտանաս Նաուսեդան, փոխանցում է Delfi-ն։
«Եթե մենք խոսում ենք պատժամիջոցների մասին, ապա իմաստ ունի խոսել ԵՄ մասշտաբով պատժամիջոցների մասին։ Թիրախային պատժամիջոցների մասին, որոնք անհրաժեշտ է կիրառել ոչ այնքան ընդհանրապես տնտեսության դեմ, որքան անձանց, որոնք կապ ունեն ընտրությունների արդյունքների կեղծման, բռնաճնշումների հետ․․․ Իշխանական որոշակի պաշտոնյաների դեմ պետք է սահմանվեն տեղաշարժման սահմանափակումներ կամ այլ կարգի ֆինանսական պատժամիջոցներ»,- ասել է Լիտվայի նախագահը Ziniu radijas ռադիոկայանի հետ հարցազրույցում։
Նրա խոսքով՝ չորեքշաբթի նախատեսված Եվրոպական խորհրդի նիստում նախատեսվում է քննարկել Բելառուսում իրավիճակը, իսկ պատժամիջոցների հարցը կլինի «բանավեճերի բաղադրիչներից մեկը»։
Գիտանաս Նաուսեդան շեշտել է, որ եթե չհաջողվի ԵՄ ընդհանուր պատժամիջոցներ ընդունել, ապա միության առանձին երկրներ կարող են մտցնել ազգային պատժամիջոցներ։ «Մի բան ակնհայտ է՝ եթե ԵՄ-ն սահմանում է պատժամիջոցներ, ապա այդ անձանց համար ԵՄ-ն, որպես այդպիսին, փակվում է, եթե դրանք սահմանում են առանձին պետություններ, ապա տարօրինակ իրավիճակ է ստեղծվում, երբ անձինք կարող են մեկնել մեկ պետություն, բայց մյուսը մուտք գործել չեն կարող։ Պատժամիջոցների արդյունավետությունն ավելի բարձր է ԵՄ մասշտաբով»,- ասել է Լիտվայի նախագահը։
Նաուսեդան մասնավորապես ընդգծել է, որ Գերմանիայի կանցլեր Անգելա Մերկելը երեքշանթի Ռուսաստանի նախագահ Վլադիմիր Պուտինի հետ զրույցի ժամանակ նրան կփոխանցի Լիտվայից լուրը։ «Գլխավորը, ինչ հիմա անհրաժեշտ է, այն է, որ ոչ մի դեպքում Բելառուսի ներքին գործերին միջամտություն չպետք է լինի՝ լինի դա Արեւմուտքի կողմից, թե Արեւելքի կողմից։ Դա չի կարելի արդարացնել։ Կարծում եմ, որ ինքը հանրությունը կգտնի բոլոր պատասխանները»,- ասել է նա։