Թբիլիսիից Մինսկ է մեկնել կառավարական հատուկ չվերթ․ Վրաստանի ԱԳՆ-ն մեկնաբանել է այս տեղեկությունը

Վրաստանի ԱԳ նախարարությունը մեկնաբանել է երեկ Թբիլիսիից Մինսկ կառավարական հատուկ չվերթը, որը գրավել է լրագրողների ուշադրությունը, հայտնում է «Նովոստի Գրուզիան»։

Արտաքին քաղաքական գերատեսչության տեղեկություններով՝ Թբիլիսիից Մինսկ է մեկնել Բելառուսի Հանրապետությունում Վրաստանի արտակարգ եւ լիազոր դեսպան Վալերի Կվարացխելիան, որը օգոստոսի 6-ից Վրաստանում էր։

Հարկ է նշել, որ Կվարացխելիան Վրաստանի ԱԳ նախարար Դավիդ Զալքալիանիի ազգականն է։

«Բելառուսի Հանրապետությունում վերջին օրերին զարգացող իրադարձությունների պատճառով նա ստիպված էր անհապաղ Մինսկ վերադառնալ։ Կապված այն հանգամանքի հետ, որ Բելառուսի հետ օդային հաղորդակցությունը սահմանափակված է, իսկ դեսպանը պետք է կարճ ժամանակում Մինսկ մեկներ, որոշում ընդունվեց նրան Մինսկ հասցնել կառավարական օդանավով»,- նշված է երկրի ԱԳՆ հաղորդագրության մեջ։

Վրաստանի ԱԳՆ-ն նաեւ առաջին անգամ հանդես է եկել Բելառուսում տեղի ունեցող իրադարձությունների գնահատմամբ։

«Բելառուսի Հանրապետությունը Վրաստանին բարեկամ երկիր է, որի հետ սերտ համագործակցություն ունենք ինչպես երկկողմ ձեւաչափով, այնպես էլ Արեւելյան գործընկերության նախաձեռնության շրջանակում։ Համապատասխանաբար մենք ուշադրությամբ հետեւում ենք իրադարձությունների զարգացմանը։ Մենք սերտ փոխգործակցության մեջ ենք այս հարցում մեր գործընկերների հետ Մեր կարծիքով՝ Բելառուսում խնդիրներն անհրաժեշտ է լուծել խաղաղ ճանապարհով։ Հուսով ենք, որ բելառուս ժողովուրդը խաղաղ ճանապարհով կլուծի իր ապագայի համար կարեւոր հարցերը»,- նշված է Վրաստանի ԱԳՆ հայտարարության մեջ։

Անհրաժեշտ է նշել, որ Վրաստանի կառավարությունը մինչեւ հիմա Բելառուսի իրադարձությունների վերաբերյալ որեւիցե հայտարարություն չէր ընդունել, որտեղ հարյուր հազարավոր քաղաքացիներ բողոքում են նախագահական ընտրությունների պաշտոնապես հայտարարված արդյունքների դեմ, որոնց համաձայն հաղթել է այդ պաշտոնում արդեն 25 տարի գտնվող Ալեքսանդր Լուկաշենկոն։ Միաժամանակ Թբիլիսիից դեռեւս Լուկաշենկոյին չեն շնորհավորել ընտրություններում հաղթելու առիթով։

Թբիլիսիից Մինսկ կառավարական օդանավի թռիչքի մասին տեղեկությունն անցած երեկոյան քննարկել են «Մթավարի» ընդդիմադիր հեռուստաընկերության եթերում։

Ռադարների տվյալներով՝ Georgia Airways ավիաընկերության բոինգը, որից սովորաբար օգտվում է Վրաստանի նախագահ Սալոմե Զուրաբիշվիլին, ացած երեկոյան իրականացրել է Թբիլիսի-Մինսկ-Թբիլիսի չարթերային չվերթ՝ Մինսկի օդանավակայանում մնալով մոտ մեկ ժամ։