Մինսկում 7 ժամ տևած բախումներից հետո ուժայինները ցուցարարներին հեռացրել են մայրաքաղաքի փողոցներից. արցունքաբեր գազ, ռետինե փամփուշտներ և լուսաձայնային նռնակներ են կիրառվել, կա 1 զոհ (տեսանյութեր)

Բելառուսի ոստիկանության ուժերն ու ներքին զորքերի ստորաբաժանումները դադարեցրել են Մինսկի կենտրոնի շրջափակումը:

ТАСС-ի թղթակիցը հաղորդում է, որ շուրջ 7 ժամ տևած բախումներից հետո ուժայիններին հաջողվել է նրանց հեռացնել փողոցներից: Բելառուսի ՆԳՆ հատուկ ստորաբաժանումները սկսել են լքել Մինսկի կենտրոնական փողոցները:

Վերջին ժամերին բախումների ակտիվ օջախը Մինսկի Կունցեվշչինայի շրջանն էր, որտե ցուցարարները երկաթե ձողերից և բետոնե քարերից բարիկադներ էին կառուցել՝ փակելով Պրիտիցկովո պողոտան և, ի պատասխան նրանց քաղաքի կենտրոնից ետ մղելու ուժային գործողությանը, դյուրավառ հեղուկով լի շշեր էին նետել իրավապահների ուղղությամբ: Հենց այդտեղ էլ նախօրեին ցուցարար էր մահացել բախումների ընթացքում:

04:13

Մինսում ուժայինները ցուցարարներին Մինսկի կենտրոնից դեպի ծայրամասեր մղելու գործողություն են սկսել:

ТАСС-ի թղթակցի փոխանցմամբ՝ ոստիկանության ուժեղացված ստորաբաժանումները ներքին զորքերի աջակցությամբ սկսել են առաջ շարվել քաղաքի կենտրոնական՝ Պրիտիցկովո փողոցով, վերջինների ետևից՝ ոստիկանության զորքերին հատուկ բեռնատարներ և այլ տրանսպորտային հատուկ միջոցներ:

Ցուցարարներն, ի պատասխան, փակել են մայրուղին ու բարիկադներ կառուցել՝ դյուրավառ հեղուկով շշեր նետելով ուժայինների ուղղությամբ:

Տեղում ցուցարարների թիվը շուրջ 200 է:

Sputnik Беларусь-ն էլ հաղորդում է, որ քաղաքի տարբեր հատվածներում տեղի ունեցած բախումների հետևանքով տուժած անձինք հիվանդանոցներ են տեղափոխվում:

03:12

Միսնկի մետրոպոլիտենի «Սպորտային» կայարանի մոտակայքում ցուցարարների և ոստիկանության ուժերի միջև բախումները շարունակվում են, ցուցարարները թիվը շարունակում է ավելանալ:

РИА Новости-ի թղթակիցը հաղորդում է, որ բախումների վայր են ժամանում պաշտպանիչ արտահագուստով՝ սաղավարտներով, արմնկակալներով և ծնկակալներով մի շարք երիտասարդներ: Վերջիններն իրենց ներկայությունը տեղում բացատրել են նրանով, որ ցանկանում են տեսնել, թե ինչ է կատարվում և իրենց բողոքն արտահայտել նախագահական ընտրությունների արդյունքների առնչությամբ:

Մետրոյի հարևանությամբ մեծ թվով ոստիկանական բեռնատարներ են տեղակայվել:

Իսկ ներքին զորքերը «Ալֆա» հատուկ ստորաբաժանման աջակցությամբ Մինսկի կենտրոնից փորձում է ցրել Պրիտիցկովո փողոցում հավաքված ցուցարարներին՝ ռետինե փամփուշտներ, լուսաձայնային նռնակներ և արցունքաբեր գազ կիրառելով նրանց նկատմամբ:

02:36

Նախագահական ընտրությունների արդյունքները չընդունող ցուցարարները Մինսկի մի շարք հատվածներում ՕՄՕՆ-ի ստորաբաժանումների ուղղությամբ «Մոլոտովի կոկտեյլներ» են նետել, հաղորդում է РИА Новости-ն:

Ուժայիններն, ըստ վերջին տվյալների, ցուցարարներին դուրս են բերել Պուշկինի հրապարակից, բախումները շարունակվում են:

Ավելի վաղ ցուցարարները շրջափակել են ներքին զորքերի երկու բեռնատար, որոնք փորձել են Պուշկինի հրապարակ մտնել, հրապարակին հարակից մետրոյի կայարանը ցուցարարները ևս փակել են:

Ոստիկանական ուժերը ցուցարարներին ցրելու նպատակով ռետինե փամփուշտներ, լուսաձայնային նռնակներ ու արցունքաբեր գազ են կիրառում:

11.08.20

01:28

Բելառուսի մայրաքաղաքում ցուցարարների և ոստիկանական ոժերի միջև բախումների ժամանակ մեկ տղամարդ մահացել է, РИА Новости-ի փոխանցմամբ՝ հայտարարել է երկրի ՆԳՆ խոսնակ Օլգա Չեմոդանովան:

«Հրապարակն ազատելու համար դեպքի վայր ժամանած հատուկ նշանակության ստորաբաժանումներին ցույց տրված դիմադրության ընթացքում մի ցուցարար փորձել է պայթուցիկ նետել իրավապահների ուղղությամբ: Այն պայթել է նրա ձեռքում, տղամարդը կյանքի հետ անհամատեղելի վնասվածքներ է ստացել»,- հայտարարել է խոսնակը:

23:22

Բելառուսի մայրաքաղաք Մինսկում ոստիկանությունը երկուշաբթի երեկոյան արցունքաբեր գազ է կիրառել ցուցարարներին ցրելու համար:

Ինչպես փոխանցում է РИА Новости-ն, մի քանի տասնյակ մարդիկ են հավաքվել մայրաքաղաքի կենտրոնում, որոնց ոստիկանությունը փորձում է ցրել: Միևնույն ժամանակ, ձերբակալություններ են տեղի ունենում ընդդիմության կողմնակիցների շրջանում:

Մինսկի ՕՄՕՆ-ն ընդդիմության աջակիցներին սկսել է դուրս բերել «Մինսկը` հերոս քաղաք» հուշակոթողի հարակից տարածքից:

Նախագահական ընտրությունների արդյունքներից դժգոհ բնակիչները ցույցեր են անցկացնում նաև Բրեստ քաղաքում, որտեղ ՕՄՕՆ-ի հատուկջոկատայինները նույնպես ուժային միջոցներ են կիրառում, հիմնականում` ռետինե փամփուշտներ և լուսաձայնային նռնակներ:

Իրավապահները զանգվածային ձերբակալություններ են կատարում Գրոդնո քաղաքի կենտրոնական փողոցում:

Հիշեցնենք, որ օգոստոսի 9-ին կայացած նախագահական ընտրություններում հաղթանակ է տարել գործող ղեկավար Ալեքսանր Լուկաշենկոն` հավաքելով ընտրողների ձայների 80.08 տոկոսը: