Վրաստանի նախագահը երկրում քրեածին իրավիճակը մտահոգիչ չի համարում

Վրաստանի նախագահ Սալոմե Զուրաբիշվիլին կարծում է, որ երկրում քրեածին իրավիճակը մնում է կայուն և որոշակի հեռուստաալիքների մեղադրում է մանիպուլյացիաների մեջ:

«Ես ապրել եմ այլ վայրերում և հստակ գիտեմ, թե ինչ է քրեական իրավիճակը: Դժբախտաբար, դա տեղի է ունենում ամենուր, դա ժամանակակից աշխարհի հիվանդությունն է: Այստեղ ոչ մի այնպիսի բան տեղի չի ունենում, ինչ տեղի չէր ունենա այլ վայրերում: Վրաստանում քրեական իրավիճակը այնքան ծանր չէ, որքան ուզում են ցույց տալ որոշ հեռուստաալիքներ»,- լրագրողներին ասել է Զուրաբիշվիլին:

Նախագահը կարծում է, որ նման մոտեցումը քրեական միջադեպերի լուսաբանման դեպքում կարող է «շատ վատ անդրադառնալ երիտասարդների և նրանց հոգեբանության վրա»: «Երբ մարդն ապրում է նման լարված միջավայրում, դա շատ մեծ պատասխանատվություն է»,- հավելել է նա:

«Ես կարծում եմ, որ մենք բոլորս պետք է պատասխանատվություն ստանձնենք, մի փոքր հանդարտվենք, կատարվածին նայենք կողքից: Մենք քրեական իրավիճակի վատթարացում չպետք է թույլ տանք, բայց մենք չպետք է հրեշ սարքենք դրանից, որը գոյություն չունի մեր երկրում»,- ասել է Զուրաբիշվիլին:

Ինչպես հաղորդում է «Նովոստի-Վրաստան» գործակալությունը, ընդդիմության առաջնորդները կտրուկ քննադատության են ենթարկել իշխող «Վրացական երազանք»-ին՝ Ախալքալաքում տեղի ունեցած անկարգություններից հետո: Ջարդերը, որոնց մասնակցել են մի քանի տասնյակ մարդիկ, սկսվել են օգոստոսի 8-ին, երիտասարդի սպանությունից հետո: Իշխանության ընդդիմախոսները կարծում են, որ, ընդհանուր առմամբ, երկրում վերջին ամիսներին հանցավորության մակարդակը զգալիորեն աճել է: Նրանց կարծիքով, սա պետական ​​կառավարման ճգնաժամի հետևանք է: