ԱՄՆ-ի տնտեսությունը երկրորդ եռամսյակում կրճատվել է առավելագույն չափով Մեծ դեպրեսիայից ի վեր
Երկրորդ եռամսյակում ԱՄՆ-ի տնտեսությունը կրճատվել է առավելագույն չափով Մեծ դեպրեսիայից ի վեր, քանի որ համավարակը հարվածել է սպառողներին եւ ընկերություններին: Ընդ որում, նոր սկսվող վերականգնումը վտանգի տակ է հայտնվել կորոնավիրուսով վարակման դեպքերի թվի կտրուկ աճի պատճառով։ Երկրորդ եռամսյակում ԱՄՆ ՀՆԱ-ն տարվա կտրվածքով կրճատվել է 32.9 տոկոսով՝ ամենամեծ անկումը ցույց տալով 1947-ից վարվող վիճակագրության սկզբից ի վեր, հայտնել է առեւտրի նախարարությունը։
ՀՆԱ-ի նախորդ ռեկորդային անկումը գրանցվել էր 1958 թվականի երկրորդ եռամսյակում եւ կազմել էր 10 տոկոս: ԱՄՆ-ի տնտեսությունը 2020 թվականի առաջին եռամսյակում 5 տոկոս էր կազմել:
Reuters-ի կողմից հարցված տնտեսագետները ապրիլին-հունիսին ՀՆԱ-ն 34․1 տոկոս անկում էին նախատեսում:
Պատմական անկման մեծ մասը բաժին է ընկել ապրիլ ամսին, երբ տնտեսական ակտիվությունը կաթվածահար եղավ ընկերությունների, գործարանների եւ ռեստորանների փակման պատճառով կորոնավիրուսի բռնկումը զսպելու համար:
Թեպետ մայիսին ակտիվությունը սկսեց վերականգնվել, կորոնավիրուսի դեպքերի արագացող աճը թուլացրեց երրորդ երրորդ եռամսյակի կտրուկ վերականգնման հույսերը:
Տնտեսագետների գնահատականներով՝ անկումը կարող էր նույնիսկ ավելի ուժգին լինել՝ առանց գրեթե 3 տրիլիոն դոլար աննախադեպ հարկաբյուջետային խթանիչների։
Երկրորդ եռամսյակում սպառողական ծախսերը նվազել են 34․6 տոկոսով, իսկ ընկերությունների ներդրումները նվազել են 27 տոկոսով:
Ապրիլ-հունիսի ամիսներին ամերիկյան արտահանման ծավալները կրճատվել են 64.1 տոկոսով, ներմուծմանը՝ 53.4 տոկոսով:
ՀՆԱ-ի տվյալների հրապարակումից հետո ԱՄՆ ֆոնդային ինդեքսների ֆյուչերսներն արագացրեցին անկումը. Մոսկվայի ժամանակով 15:57-ի դրությամբ Dow-ում ֆյուչերսները նվազեցին 1.15 տոկոսով, S&P 500-ում՝ 1.08 տոկոսով, Nasdaq 100-ում՝ 1.15 տոկոսով։
Հիմնական արժույթների զամբյուղի նկատմամբ դոլարի ինդեքսը մնացել է անփոփոխ՝ պահպանվելով 93․46 կետի մակարդակում։