«Մեր նպատակն է՝ կարողանալ անձամբ վարչապետ Փաշինյանի գործողություններին հակազդել». Իշխան Սաղաթելյան. Armlur.am
Մեր դիրքորոշումը Սահմանադրական դատարանի հետ կապված շատ հստակ է, տեղի է ունեցել դատական իշխանության զավթում գործադիր իշխանության կողմից: Այս մասին ArmLur.am-ին տված հարցազրույցի ժամանակ ասել է ՀՅԴ ԳՄ ներկայացուցիչ Իշխան Սաղաթելյանը՝ անդրադառնալով Սահմանադրական դատարանի թեկնածու Վարդան Ավետիսյանի առաջադրմանը, ինչպես նաեւ իրենց գործընկեր ԲՀԿ-ի շուրջ կատարվող գործընթացներին:
«Ապօրինի քայլերով և գործողություններով իշխանությունը փորձում է ունենալ սեփական խամաճիկ Սահմանադրական դատարանը, և գլխավոր խնդիրը դա է: Դրանից հետո այն դատավորներին, ովքեր պետք է ազատվեն Սահմանադրական դատարանի անդամի պարտականությունից, ումով և ինչպես կփոխարինվեն, դա արդեն երկրորդական է, բուն և գլխավոր խնդիրն այն է, որ իշխանությունը ապօրինի քայլերով գնաց ՍԴ-ի յուրացման ճանապարհով»,- ասաց Իշխան Սաղաթելյանը:
Անդրադառնալով Հատուկ քննչական ծառայության կողմից մերժված «Դաշնակցություն», «Բարգավաճ Հայաստան» և «Հայրենիք» կուսակցությունների ներկայացրած դիմումին, որտեղ նշվում էր, որ սահմանադրական կարգի տապալում է եղել, Իշխան Սաղաթելյանը ասաց. «Մենք պաշտոնական պատասխան դեռ չենք ստացել, ստանալուց անմիջապես հետո համապատասխան ասուլիսով երեք քաղաքական ուժերը հանդես կգան և իրենց դիրքորոշումը կներկայացնեն»:
Խոսելով երեք կուսակցությունների գործունեության մասին Իշխան Սաղաթելյանը նշեց, որ 3 ուժեր օրակարգային հարցերի շուրջ որոշել են համագործակցել. «Կարծում եմ՝ ֆորմատի լայնացման առումով և քայլերի ու գործողությունների առումով, որոնք հետևողական են ու ամբողջական, հանրությունը առաջիկայում ականատես կլինի: Մեր նպատակն այն է, որ ավելի ամուր ու ամբողջական համադրված աշխատանք տարվի, որպեսզի կարողանանք գործադիր իշխանությանը և անձամբ վարչապետ Նիկոլ Փաշինյանի գործողություններին հակազդել, քանի որ նրանք երկիրը տանում են այլ ճանապարհով»,- ասաց նա:
Այն հարցին, թե արդյոք կուսակցության վրա ճնշումներ նկատվում են, թե ոչ, վերջինս պատասխանեց, որ նկատում են ճնշման փորձեր և իրենք անհրաժեշտության դեպքում այդ մասին կխոսեն. «Ակնհայտ է, որ իշխանության հիմնական գործիքն ընդդիմության նկատմամբ ճնշումներն են, քրեական գործերն են, մի մասին փորձում են վախեցնել, մի մասին՝ լռեցնել: Սակայն Դաշնակցությունը ոչ մի վախենալու բան չունի, նրան 130 տարի շարունակ չեն կարողացել ճնշել և որևէ մեկի մտքով էլ թող չանցնի, որ կկարողանա: Մենք պատրաստ ենք ցանկացած սցենարի, ինչ լեզվով խոսեն, այդ լեզվով կխոսենք»: