Մանկավարժական համալսարանի պատմաբանները առարկություններ են ներկայացրել ԿԳՄՍՆ չափորոշիչների վերաբերյալ
Հայկական պետական մանկավարչական համալսարանի համաշխարհային պատմության եւ նրա դասավանդման մեթոդիկայի ամբիոնն արտահերթ նիստ է անցկացրել եւ անդրադարձել ԿԳՄՍ նախարարության կողմից հանրային քննարկման ներկայացված հանրակրթական «Ես, իմ հայրենիքն ու աշխարհը» դասընթացի եւ «Համաշխարհային պատմություն» առարկայի չափորոշիչների եւ ծրագրերի նախագծերը:
Մասնավորապես իրենց տեսակետներն են արտահայտել ՀՀ ԳԱԱ ակադեմիկոս Ռուբեն Սաֆրաստյանը, պատմական գիտությունների թեկնածուներ Հ. Գրիգորյանը, Ա. Մարտիրոսյանը, Ն. Մինասյանը, Մ. Մարտիրոսյանը, Գ. Մարգարյանը եւ պատմական գիտությունների դոկտոր Ե. Գրեկյանը:
Նրանք 7 կետից բաղկացած առարկություններով են հանդես եկել, որը ներկայացնում ենք ստորեւ.
«1.Ներկայացված նախագծերն ընդունելի չեն հայեցակարգային առումով, քանի որ խախտված է ժամանակագրական հաջորդականության սկզբունքը: Նման մոտեցումը խնդիրներ կառաջացնի ուսումնառության ընթացքում՝ խոչընդոտելով աշակերտների մոտ աշխարհայացքի ձեւավորմանը:
2. Հասկանալի չէ ժամանակագրական սահմանաբաժանման սկզբունքը, երբ հստակ նշված չեն պատմական ժամանակաշրջանների սահմանները: Այս ամենն էլ կդժվարացնի աշակերտներիկողմից նյութի ընկալումը:
3. Հանրակրթական ծրագրերի նախագծերում հեղինակները բաց են թողել այնպիսի կարեւոր գաղափարախոսություն, ինչպիսին է պահպանողականությունը, սակայն նշվում է գենդերի մասին, որպես քաղաքական գաղափարախոսության, որի ընդգրկումը հանրակրթական ծրագրերի նախագծերում խիստ վիճահարույց է:
4.Ներկայացված ծրագրերի նախագծերում առկա են նաեւ որոշ սխալներ եւ անճշտություններ, մասնավորապես Պորտասարը ոչ թե գյուղատնտեսական, այլ մինչերկրագործական դարաշրջանի հուշարձան է կամ իրանա-հայկական քաղաքակրթություն գոյություն չունի:Միաժամանակ առաջադրված են հարցադրումներ, որոնց պատասխանը ժամանակակից գիտությունը չունի:
5. Մի շարք կարեւոր թեմաներ եւ խնդիրներ ուղղակի ընդգրկված չեն թե՛ հիմնական դպրոցի, թե՛ ավագ դպրոցի ծրագրերի նախագծերում, որոնց բացակայությունն ակնհայտորեն խանգարելու է համաշխարհային պատմության վերաբերյալ համակողմանի պատկերացում կազմելուն: Օրինակ, տեղ չի հատկացվել իսլամին, միջնադարյան Օսմանյան կայսրության պատմությանը, էթնոքաղաքական հակամարտություններին եւ այլն:
6. Ըստ էության գերագնահատված են աշակերտների կարողություններն ու ունակությունները, քանզի ծրագրերի նախագծերում ներկայացված մի շարք «վերջնարդյունքներ» մեթոդաբանական առումով դժվար ըմբռնելի են աշակերտների համար: Օրինակ, 12-րդ դասարանում սովորողի համար ներկայացված վերջնարդյունքներից է. «Գիտակցի աշխարհաքաղաքական իրադրությունը, համեմատի համաշխարհային պատմական գործընթացների բնույթը եւ հետեւանքները, համապատասխան փաստահենք եզրահանգումներ անի եւ այլընտրանքներ առաջարկի համաշխարհային պատմական զարգացումների, երեւույթների եւ հետեւանքների վերաբերյալ», ինչը բուհի բարձր կուրսերի ուսանողներն անգամ կդժվարանան կատարել:
7. Ներկայացված ծրագրերի նախագծերի հեղինակները հաշվի չեն առել գործող դպրոցների պայմանները եւ տեխնիկական հագեցվածությունը, ինչպես նաեւ ուսուցիչների պատրաստվածության աստիճանը:
Ի վերջո, արտահերթ նիստում որոշել են, որ մասնակիցները համակարծիք էին, որ ներկայացված չափորոշիչների եւ ծրագրերի նախագծերը խոցելի են մեթոդաբանական առումով եւ ունեն վերանայման ու վերաշարադրման կարիք: Ելույթ ունեցողները նշեցին նաեւ, որ ամբիոնը պատրաստ է մասնագիտական քննարկման շրջանակներում նախագծի հեղինակներին եւ շահագրգիռ կողմերին առավել մանրամասն ներկայացնելու եւ մատնանշելու նախագծի թերացումների եւ բացթողումների վերաբերյալ դիտարկումները: