ՍԴ-ում այս վիճակն առաջացել է այն պատճառով, որ ՍԴ երկու դատավորներ գնացել են արձակուրդ. Այսինքն եթե նրանք չգնային արձակուրդ, ՍԴ-ում կլիներ քվորում. Ռուստամ Բադասյան
ՍԴ-ում ստեղծված իրավիճակն առաջացել է այն պատճառով, որ ՍԴ երկու դատավորներ գնացել են արձակուրդ: Այս մասին, այսօր՝ հուլիսի 22-ին, լրագրողների հետ զրույցում նշեց արդարդատության նախարար Ռուստամ Բադասյանը
«Այսինքն եթե նրանք չգնային արձակուրդ, ՍԴ-ում կլիներ քվորում: Այսինքն պատճառը Սահմանադրական փոփոխությունները չեն: Երկրորդ, այդ երկամսյա ժամկետը համընկնում է նրա հետ, որ ամեն տարի դա ՍԴ-ում արձակուրդային ժամանակահատված է եղել: Ոչ մի խնդիր չի առաջանա, վստահ եմ, որ առաջադրումները շուտով կկատարվեն: ԱԺ-ն թեկնածուների մասով կուղարկի բարեվարքության ստուգման գործընթացն ապահովելու համար Կոռուպցիայի կանխարգելման հանձնաժողովին: Բավական շուտ ժամանակահատվածում կարող ենք արձանագրել, որ ՍԴ-ն կգործի ամբողջ կազմով»,-հայտարարեց նա:
Հարցին, թե համարում է, որ Սահամանդրական դատարանում ճգնաժամ չկա, նա պատասխանեց. «Ես դա ճգնաժամ չէի համարի, բայց խնդրահարույց իրավիճակը առաջացել է այն պատճառով, որ երկու դատավոր որոշել են մեկնել արձակուրդ»:
Անդրադառնալով նրան, որ այսօր ԱԺ նախագահ Արարատ Միրզոյանը ստորագրել է Սահմանադրական դատարանի մասին օրենքի փոփոխությունների փաթեթը, Բադասյանը շեշտեց, որ դրան հաջորդող քայլեր չկան:
«Եթե նկատի ունեք ՍԴ դատավորի թեկնածուների առաջադրումները, դրանք հաջորդող քայլեր են սահմանադրական փոփոխություններից հետո: Սահմանադրական փոփոխությունների գործողության մասին բազմիցս նշել ենք: Սահմանադրությամբ նախատեսված է երկամսյա ժամկետ սահմանադրական մարմինների կողմից ՍԴ դատավորի թեկնածուներ առաջադրելու համար եւ այդ ժամկետը հոսում է: Դա նշանակում է, որ այդ մարմինները շատ շուտով պետք է ներկայացնեն իրենց թեկնածուներին: Իսկ ՍԴ մասին օրենքի ուժի մեջ մտնելը նշանակում է, որ ՍԴ արդեն նախկին դատավորների կենսաթոշակի հետ կապված հարցերը, որոնք արդեն չեն պաշտոնավարում կապահովվի օրենքով սահմանված կարգով: Ինչպես նաեւ սրանով վերացվեց անհամապատասխանությունը Սահմանադրության եւ ՍԴ մասին օրենքի միջև»,-ասաց Բադասյանը՝ հավելելով, որ հնարավոր չէր միանգամից և սահմանադրական փոփոխություններն ընդունել և ՍԴ մասին օրենքի փոփոխությունները:
Նա ընդգծեց, որ Սահմանադրական փոփոխություններից հետո ՍԴ երեք դատավորները՝ Ավինա Գյուլումյան, Հրանտ Նազարյան եւ Ֆելքիս Թոխյան, այլեւս ՍԴ դատավորներ չեն:
Ինչ վերաբերում է ՍԴ դատավորի թեկնածուներին, Բադասյանն ասաց. «Երբ որ ՍԴ դատավորի թեկնածուն կընդգրկվի կառավարության համապատասխան նիստում, կտեսնեք, որ կառավարությունը թեկնածու ունի արդեն: Քանի դեռ նման բան նիսում ընդգրկված չէ, նշանակում է կառավարությունը թեկնածու չունի:
Կան սկզբունքներ, թե ինչ ճանապարհով մեր կարծիքով պետք է ՍԴ-ի եւ առհասարակ դատական մարմինների ձեւավորումը տեղի ունենա: Թեկնածուները պետք է հնարավորինս ապաքաղաքական անձինք լինեն եւ այնպիսի անձինք լինեն, որոնք կարող են ապահովել դատական իշխանության անկախությունը իրենց մասնակցությամբ:
Ես չեմ կարող ասել, թե ում թեկնածություններն են դիտարկվում: Վստահ չեմ կարող ասել հուլիսի վերջին, թե օգոստոսի սկզբին, բայց կարծում եմ այդ ժամանակներում կլինի»: