Այսօր՝ հուլիսի 21-ին, Ուկրաինայի Լուցկ քաղաքի կենտրոնում պայթուցիկով տղամարդը 20 ուղևորով ավտոբուս է պատանդառել. Նա բուժվելիս է եղել հոգեբուժարանում
Այսօր՝ հուլիսի 21-ին, Ուկրաինայի Լուցկ քաղաքի կենտրոնում պայթուցիկով տղամարդը 20 ուղևորով ավտոբուս է պատանդառել: Քաղաքի անվտանգությունն ապահովելու նպատակով քաղաքի կենտրոնի տարածքն արգելափակվել է: Ուկրաինայի նախագահ Վլադիմիր Զելենսկին հայտարարել է, որ իրավիճակն իր անձնական հսկողության տակ է պահում։
Տղամարդը, ով պատանդներ է վերցրել Լուցկում, ներկայացել է որպես Մաքսիմ Պլոխոյ: Այս մասին իր ֆեյսբուքյան էջին գրել է ՆԳ փոխնախարար Անտոն Գերաշչենկոն: «Պատանդ վերցրած անձը 09:25-ին զանգահարել է ոստիկանություն եւ ներկայացել է որպես Մաքսիմ Պլոխոյ: Համացանցում կա Մաքսիմ Պլոխոյի հեղինակած «Հանցագործի փիլիսոփայությունը» գիրքը, որում նկարագրվում է հեղինակի կյանքը կալանավայրերում եւ նրա աշխարհայացքը»,- գրել է Գերաշչենկոն:
Մաքսիմ Պլոխոյ անունով տղամարդն Ուկրաինայի կառավորությանն ուղղված պահանջներով գրառում է տեղադրել Twitter-ի իր էջին: Եթե կարճ, ապա նա դժգոհ է համակարգից: Նա նաեւ պահանջել է, որպեսզի Ուկրաինայի բարձրաստիճան պաշտոնյաները տեսանյութ հրապարակեն խոստովանությամբ, որ իրենք «օրենքով ահաբեկիչներ» են:
Ավելի ուշ տղամարդը հայտնել է ևս մեկ պայթուցիկի մասին, հայտնել է «Ուկրաինա 112» հեռուստաալիքը՝ վկայակոչելով գլխավոր դատախազի գրասենյակը։
«Տղամարդը հայտնել է, որ ավտոբուսը ականապատված է, նա իր մոտ զենք ունի եւ մեծ քանակությամբ պայթուցիկ: Բացի այդ, ըստ նրա, եւս մեկ պայթուցիկ սարք գտնվում է այլ վայրում եւ կարող է գործարկվել հեռավար կարգով: Նա իր պահանջները հրապարակել է սոցիալական ցանցերում: Ավտոբուսից մի քանի կրակոց է հնչել, վնասվել է երկու պատուհան։ Տուժածների մասին դեռ տեղեկություններ չկան»,- նշվում է հաղորդագրության մեջ:
Միեւնույն ժամանակ, ոստիկանությունը նշել է, որ հանցագործն ավելի վաղ բուժում էր անցնում հոգեբուժարանում: