ԵԱՀԿ նախագահը հանձնարարել է ԵԱՀԿ քարտուղարության ղեկավարի տեղակալին կատարել գլխավոր քարտուղարի գործառույթները

ԵԱՀԿ ալբանական նախագահությունը հանձնարարել է ԵԱՀԿ քարտուղարության ղեկավարի տեղակալին՝ Ֆինլանդիայի ներկայացուցիչ Տուլե Յուրյոլին, 2020 թվականի հուլիսի 19-ից ԵԱՀԿ գլխավոր քարտուղարի հիմնական գործառույթները կատարել մինչեւ այս միջազգային կազմակերպության նոր գլխավոր քարտուղարի նշանակումը: Այս մասին շաբաթ գիշերը հայտնել է ԵԱՀԿ-ում Ալբանիայի նախագահությունը, փոխանցում է ՏԱՍՍ-ը:

Դրանից բացի որոշվել են անցումային շրջանում ԵԱՀԿ երեք կարեւորագույն գործադիր կառույցների ժամանակավոր ղեկավարները՝ ԵԱՀԿ Ժողովրդավարական հաստատությունների եւ մարդու իրավունքների գրասենյակի (ԺՀՄԻԳ) տնօրենի առաջին տեղակալ Կատարժինա Գարդապխաձեն կապահովի ԺՀՄԻԳ մանդատի անընդհատ կատարումը մինչեւ նոր տնօրենի նշանակումը, ԵԱՀԿ ազգային փոքրամասնությունների հարցերով գերագույն հանձնակատարի վարչության տնօրեն Քրիսթոֆ Քամփը կապահովի այդ վարչության աշխատանքը մինչեւ գերագույն հանձնակատարի նշանակումը, ԵԱՀԿ լրատվամիջոցների ազատությունների հարցերով ներկայացուցչի գրասենյակի տնօրեն Յուրգեն Հայսելը կապահովի այդ գրասենյալի աշխատանքը մինչեւ լրատվամիջոցների ազատությունների հարցերով ներկայացուցչի նշանակումը:

Ալբանական նախագահությունը ԵԱՀԿ 57 պետությունների կոնսոնսուսի բացակայության պայմաններում, որ առնչվում է նոր երեքամյա ժամկետով գլխավոր քարտուղար Թոմաս Գրեմինգերի եւ գործադիր կառույցների երեք ղեկավարների մանդատների երկարաձգմանը, որոնց լիազորություններն ավարտվում են հուլիսի 18-ին, ԵԱՀԿ պետություններին տեղեկացրել է այն մասին, որ կազմակերպության գործող նախագահը՝ Ալբանիայի վարչապետ եւ ԱԳ նախարար Էդի Ռաման միջոցառումներ է ընդունել ԵԱՀԿ անընդհատ աշխատանքի ապահովման, ֆինանսական եւ նյութական պաշարների կառավարման համար:

Հուլիսի 16-ին Ալբանիայի նախագահության ներկայացուցիչը ՏԱՍՍ-ի թղթակցին հայտնել էր, որ ԵԱՀԿ երկրները չեն կարողացել կոնսենսուսի գալ գործադիր կառույցների գործող ղեկավարների լիազորությունների ժամանակավոր երկարաձգման հարցում այն բանից հետո, երբ անցյալ շաբաթ տապալվել էր նոր եռամյա ժամկետով 4 մանդատների փաթեթային երկարաձգումը: Այսպիսի իրավիճակին համապատասխան ԵԱՀԿ-ը հուլիսի 18-ից աշխատանքը կշարունակի առանց գլխավոր քարտուղար Թոմաս Գրեմինգերի, ԺՀՄԻԳ տնօրեն Ինգիբերգ Սոլրուն Գիսլադոտիրի, ազգային փոքրամասնությունների գործերով գերագույն հանձնակատար Լամբերտո Զանիերի, լրատվամիջոցների ազատությունների հարցերով ներկայացուցիչ Արլեմ Դեզիրի:

Հուլիսի 10-ին ԵԱՀԿ երկրների ներկայացուցիչները չէին կարողացել կոնսենսուսի հասնել կազմակերպության գործադիր կառույցների 4 ղեկավարներին նոր եռամյա ժամկետով վերանշանակելու հարցում: Այս կապակցությամբ ալբանական կողմը գործարկել է այս պաշտոններին նոր թեկնածուների ընտրության ընթացակարգ: ԵԱՀԿ երկրներին հանձնարարվել է 2020 թվականի սեպտեմբերի 18-ին թեկնածուներ առաջադրել, որ կարողանան նրանց հաստատել դեկտեմբերին Տիրանայում կայանալիք ԵԱՀԿ ԱԳ նախարարների խորհրդի նիստում:

ՏԱՍՍ-ի տեղեկություններով՝ ԵԱՀԿ մշտական խորհրդի նախապատրաստական կոմիտեի նիստում ալբանական նախագահության առաջարկը Գրեմինգերի, Գիսլադոտիրի, Զանիերի եւ Դեզիրի մանդատների փաթեթով (միաժամանակյա) երկարաձգման մասին աջակցություն չի ստացել առանձին պետությունների դիրքորոշման պատճառով: Դեզիրի մանդատի երկարաձգմանը դեմ է հանդես եկել Ադրբեջանը, Գիսլադոտիրի մադատի երկարաձգման դեմ՝ Տաջիկստանը եւ Թուրքիան: Սրա հետեւանքով արեւմտյան երկրների խումբը՝ Ֆրանսիայի եւ Կանադայի գլխավորությամբ ի պատասխան Դեզիրի եւ Գիսլադոտիրի մադատների երկարաձգման արգելափակման՝ վետո են դրել Գրեմինգերի եւ Զանիերի մանդատների երկարաձգման վրա: Վերջնարդյունքում ղեկավարների 4 մանդատներն էլ արգելափակվել են: