Սահմանին իրավիճակի լարվելուց հետո Սոսը ծնողների հետ կապ էր հաստատել. «Ամեն ինչ լավ է լինելու» (Տեսանյութ)
Շատ էր նվիրված ռազմական գործին, հայրենիքի իսկական պաշտպան էր։ Այսպես է բնութագրումը Շիրակի մարզի Մարմաշեն գյուղի վարչական ղեկավար Համլետ Տիգրանյանը իր համագյուղացի, 28-ամյա կապիտան Սոս Էլբակյանին, որը երեկ հայ-ադրբեջանական պետական սահմանագոտու հյուսիսարևելյան հատվածում հակառակորդի արձակած կրակից մահացու վիրավորում էր ստացել։
«Խեղդվում է կոկորդս»,- NEWS.am-ի հետ զրույցում ասել է պարոն Տիգրանյանը, ով դժվարությամբ էր մտքերը հավաքում կապիտանի մասին խոսելիս։
Նա պատմել է, որ Սոս Էլբակյանը սովորել է Վազգեն Սարգսյանի անվան ռազմական ինստիտուտում, ապա լեյտենանտի կոչումով Զինված ուժերում աշխատանքի անցել։
«Փոքրուց էլ սիրում էր զինվորական կյանքը, ամբողջ հոգով նվիրված էր այդ ուղղությանը, և գնաց այդ ուղղությամբ էլ սովորեց ու աշխատանքի անցավ։ Շատ հարգված երիտասարդ էր իր շրջապատում, չկա մեկը, որ այսօր չսգա և լավ խոսքեր չասի նրա մասին»,- ասել է Համլետ Տիգրանյանը։
Կապիտան Էլբակյանին գյուղի վարչական ղեկավարը վերջին անգամ մեկ ամիս առաջ էր տեսել։ Կապիտանն այդքան էլ հաճախ չէր գալիս գյուղ, որովհետև ուղնուծուծով նվիրված էր իր գործին։
«Ապրում էր ծնողների հետ, քույր ու եղբայր ունի, ինքը տան փոքրն էր։ Ծնողներն արդեն թոշակառուներ են, աշատող, չարչարվող, իրենց քրտինքով օրվա հացը վաստակող ընտանիք է»,- նշել է Տիգրանյանը։
Նրա խոսքով, երբ սահմանին իրավիճակը լարվել էր արդեն, Սոսը ծնողների հետ կապ է հաստատել, գոտեպնդել, ասել, որ ամեն ինչ լավ է լինելու։ Կապիտան Էլբակյանի հետ կապն ընդհատվել է այսօր առավոտյան, ծնողների զանգերն անպատասխան են մնացել։
Բանակի նկատմամբ Սոս Էլբակյանի սիրո մասին գյուղում բոլորը գիտեն։ Տիկին Մնացյանը, որը կապիտանի ինֆորմատիկայի ուսուցչուհին է՝ արցունքն աչքերին է խոսում աշակերտի մասին. «Նա այնպիսի աշակերտ, մարդ էր, որ հնարավոր չէ նրա մասին լռել, ու հենց այդ ամենը ապացուցեց այսօրվա իր արարքը։ Շատ համեստ, խելոք, պարտաճանաչ, խելացի, ամեն ինչում ինքն առաջինն էր»։
Ուսուցչուհին վերջին անգամ աշակերտին ձմռանն էր տեսել, ուրախության առիթի էին մասնակցում. «Ես որ տեսա՝ չճանաչեցի, մեծացել, գեղեցկացել էր․․․չգիտեմ ինչ ասեմ։ Արժանի չէր․․․Ինքն առանձին եկավ մոտեցավ մեր սեղանին, բոլորիս հետ զրուցեց, մարդ չկար, որի կողքով անտարբեր անցներ,- հուզմունքը չթաքցնելով պատմեց Տիկին Մնացյանը,– Էս վերջերս, որ զրուցում էինք, տղաս ասում էր՝ աղջիկ է փնտրում, որ ամուսնանա»։
Հիշեցնենք, ավելի վաղ հայտնի էր դարձել, որ Սոսը Մարմարաշենի համայնքապետի հորեղբոր տղան էր: