ԱՄՆ-ն քննում է երեխաների անձնական տվյալների պաշտպանության խախտման վերաբերյալ TikTok-ի դեմ մեղադրանքները
ԱՄՆ Առեւտրի դաշնային հանձնաժողովը եւ արդարադատության նախարարությունը քննում են հայտնի TikTok-ի դեմ մեղադրանքները, ըստ որոնց TikTok-ը չի կարողացել կատարել երեխաների անձնական կյանքի պաշտպանության վերաբերյալ 2019-ի պայմանագիրը, հայտնում է Reuters-ը՝ վկայակոչելով սեփական աղբյուրները:
Ընկերության տեխնիկական քաղաքականության ներկայացուցիչը եւ մեկ այլ աղբյուր գործակալությանը հայտնել են, որ իրենք մասնակցել են մի շարք վիդեոկոնֆերանսների Առեւտրի դաշնային հանձնաժողովի եւ ԱՄՆ արդարադատության նախարարության ներկայացուցիչների հետ, որոնց ընթացքում տեղի է ունեցել մեղադրանքների քննարկումը։
Մի շարք կազմակերպություններ, այդ թվում՝ Թվային տեղեկատվության կենտրոնը եւ «Մանկություն առանց գովազդի» քարոզարշավը մայիսին դիմել էին Առեւտրի դաշնային հանձնաժողովին՝ իրենց մեղադրանքները քննելու համար, որոնց համաձայն հայտնի հավելվածը, ի թիվս այլ մեղադրանքների, ձախողել է մինչեւ 13 տարեկան անձանց տեսագրությունները եւ անձնական տեղեկությունը ջնջելու գործում։
Ընդ որում, TikTok-ում հայտարարել են, որ իրենց լուրջ են վերաբերվում բոլոր օգտատերերի անվտանգությանը՝ հավելելով, որ Միացյալ Նահանգներում նրանք 13 տարեկանից ցածր օգտատերերին գրանցում են հատուկ սահմանափակ հավելվածում, որը հագեցած է անվտանգության եւ պաշտպանության լրացուցիչ գործիքներով՝ ստաղծված հատույ երիտասարդ լսարանի համար:
Երկրորդ աղբյուրը հայտնել է, որ փաստաբանները հանդիպել են երկու գերատեսչությունների ներկայացուցիչների հետ՝ քննարկելու համաձայնագրի հնարավոր խախտման հետ կապված մտահոգիչ հարցերը:
Անցյալ տարվա տվյալներով՝ Միացյալ Նահանգներում TikTok-ի ամսական ակտիվ օգտատերերի մոտ 60 տոկոսը 16-ից 24 տարեկան երիտասարդներ են:
Հիշեցնենք, որ ԱՄՆ պետքարտուղար Մայք Պոմպեոն նախօրեին ասել էր, որ Միացյալ Նահանգները «քննարկում են» չինական սոցիալական ցանցերի, այդ թվում՝ TikTok-ի համար արգելքի ներդրման հնարավորությունը:
ԱՄՆ օրենսդիրներն ավելի վաղ մտահոգություն էին հայտնել այն կապակցությամբ, թե ինչպես է TikTok-ն մշակում օգտատերերի տվյալները: Մասնավորապես, նրանց մտահոգում են Չինաստանի օրենքները, որոնք տեղական ընկերություններին պարտավորեցնում են համագործակցել Չինաստանի հետախուզական ծառայությունների հետ: