Խաղում կարևորը «դուխը չգցելն» է, պարտվելու պարագայում նորից հաղթելու կամք ունենալը. Աշխարհի առաջնությանը մասնակցած 10ամյա շախմատիստուհի Սոնայի կարգախոսը (Լուսանկարներ)

Անահիտի ու Սոնայի զրույցներն իրենց հասակակիցների զրույցներից շատ են տարբերվում. հիմնական թեման մեկն է՝ շախմատը, շախմատը և էլի շախմատը: Մինչև համավարակն իրենց առօրյան առանց Մալաթիա-Սեբաստիայի շախմատի մանկապատանեկան մարզադպրոց այցելության գրեթե չէին պատկերացնում: Երբ իրենց սիրելի շախմատային տան բակում դարձյալ խաղատախտակների առջև նստելու հնարավորություն ընձեռվեց, անտեսեցին քամին, ուղղեցին զգեստներին համապատասխանեցված դիմակներն ու խորասուզվեցին խաղի մեջ:

Աղջիկները տանը ևս շախմատին շատ ժամանակ են հատկացնում: Օրեր է լինում, որ Սոնան մինչև տասը ժամ չի կտրվում սիրելի խաղից: Ահա այդպես, ջանք չխնայելով՝ այս տարի Երևանի շախմատի աղջիկների առաջնության մինչև 10 տարեկանների խմբում 1-ին տեղը գրավեց և հնարավոր 9 միավորից հավաքեց 8.5: Սոնան այս հաղթանակը համարում է իր ամենամեծ հաջողությունը: Աշխարհի առաջնությանը մասնակցած շախմատիստուհին գիտի՝ խաղում կարևորը «դուխը չգցելն» է ու պարտվելու պարագայում նորից հաղթելու կամք ունենալը: «Պետք է չընկճվես, շուտ չուրախանաս, սառնարյունություն ցուցաբերես ու դիմադրողականություն ունենաս, որ երկար նստես, կարողանաս մտածել ու զուգահեռ խաղալ»,-ասում է Սոնան՝ պատմելով, որ 5 ժամանոց պարտիաներ էլ է ունեցել:

Անահիտը ևս չկա օր, որ մոռանա շախմատի մասին: Հայրիկի ու եղբոր հետ խաղալուց բացի՝ օրական մի քանի ժամ պարտիաներ է նայում, սկզբնախաղեր սովորում և խնդիրներ լուծում: Նախորդ տարի Հայաստանի մինչև 10 տարեկան աղջիկների շախմատի առաջնությունում 1-ին տեղ գրաված ու Եվրոպայի առաջնությունում 7-րդ հորիզոնականը նվաճած կանաչաչյա շախմատիստուհին նշում է՝ շախմատը միշտ է իր կյանքում լինելու՝ անկախ նրանից, թե ինչ մասնագիտություն կընտրի հետագայում: Բնությունը շռայլ է գտնվել, ու բացի լավ շախմատ խաղալը՝ Անահիտը նաև հիանալի նկարում է: Իր համար շախմատը նախևառաջ մտածելակերպ է: «Պիտի մտածես, որ այս քայլն արեցիր, հաջորդն ի՞նչ ես անելու, հեռատես լինես»,-ասում է ու ընդգծում՝ շախմատը մեկ քայլի խաղ չէ: Ինքն էլ իր խաղերում փորձում է մինչև վերջին վայրկյանը զգոնություն պահպանել ու սովորել նաև պարտված պարտիաներից:

Աղջիկները սիրում են իրենց գիտելիքները մյուսներին փոխանցել: Երբ դիմում են շախմատի որևէ խնդիր լուծելու խնդրանքով, միշտ ցանկանում են բացատրել ու շախմատային լույսը հասանելի դարձնել նաև ուրիշներին:

Հ.Գ. Մեր այս ու նախորդ պատմության պայծառ հերոսների հաղթանակների շնորհիվ Մալաթիա-Սեբաստիայի շախմատի մանկապատանեկան մարզադպրոցը 3 տարի անընդմեջ նվաճել է Երևանի մարզադպրոցների առաջնության փոխանցիկ գավաթը:

Երևանի Շախմատի Ֆեդերացիայի Facebook-ի էջից