Առանձին իրավական ակտ չպետք է լինի, որ ՍԴ դատավորի լիազորությունները դադարել են. Նիկոլայ Բաղդասարյան
Ես ողջունում եմ, որ ՍԴ անդամները ցանկանում են վիճարկել ընդունված որոշումները, որեւէ առարկություն չունեմ, որ իերնք իրենց իրավունքները պաշտպանեն, հակառակը, դա ցույց է տալիս իշխանության կամքը, որ մեր իշխանության ժամանակ դատավորները որեւէ խնդիր չունեն վիճարկելու իրենց ենթադրյալ խախտված իրավունքները, այդ թվում մինչեւ ՄԻԵԴ: Այս մասին այսօր՝ հունիսի 30-ին, ԱԺ-ում լրագրողների հետ զրույցում նշեց ԱԺ «Իմ քայլը» խմբակցության պատգամավոր Նիկոլայ Բաղդասարյանը:
Ինչ վերաբերում է նրան, որ սահմանադրական փոփոխություններից հետո նոր տեսել են, որ ՍԴ-ի մասին օրենքն էլ պետք է փոխեն, պատգամավորն ասաց, որ նախ պետք էր սահմանադրական փոփոխություններ անել, որից հետո կարելի էր փոխել նաեւ ՍԴ մասին օրենքը, քանի որ վերջինս արդեն հակասում էր սահմանադրության դրույթներին. «Անտրամաբանական կլիներ սահմանադրական փոփոխությունից առաջ ընդունել կամ զուգահեռ ընդունել՝ չիմանալով, թե այդ սահմանադրական փոփոխությունը ուժի մեջ կմտներ, թե ոչ:
Իմ անձնական կարծիքն ասեմ, որ որեւէ իրավական ակտ չի կարող լինել, որը կֆիքսի, որ տվյալ դատավորների լիազորությունները դադարել են: Դա Սահմանադրության մեջ գրված է, առանձին իրավական ակտ չպետք է լինի: Դուք կարող եք տիկին Գյուլումյանին հարցնել, թե արդյոք առանձին իրավական ակտով է նշանակվել այդ պաշտոնին: Ես օրինակ բերեմ, ասենք ձեզ նշանակում են պաշտոնի եւ ձեզ հետ կնքվում է աշխատանքային պայմանագիր: Ոչ իրենց հետ, ոչ ինձ հետ պայմանագիր չի կնքվել, եւ երբ իմ շամկետը լրանում է, ես դադարում եմ լինել պատգամավոր: Սահմանադրությամբ ամրագրվել է, որ իրենց ժամկետը դադարել է: Երբ Սահմանադրությունն ընդունում են, դրա հետ հիմնավորումներ էլ կան, պետք է բացել հիմնավորումները, որտեղ մենք որպես պատգամավորներ արձանագրել ենք, որ նաեւ Ալվինա Գյուլումյանի լիազորություններն են դադարում: Ալվինա Գյուլումյանը պետք է շատ լավ իմանա, որ այդ հիմնավորումները եւս փոփոխությունների բաղկացուցիչ մաս են եւ Սահմանադրությունը մեկնաբաելիս պետք է օգտագործել այդ հիմնավորումները, որտեղ շատ հստակ գրված է: Այստեղ վեճ չկա»:
Հարցին, թե արդյո՞ք Հրայր Թովմասյանի արձակուրդ գնալը կարող է խնդիրներ առաջացնել իր լիազորությունները դադարեցնելու առումով, Նիկոլայ Բաղդասարյանը պատասխանեց. «Սահմանադրության հիմնավորման մեջ գրված է, որ իր լիազորությունները որպես ՍԴ նախագահ, դադարում են: Այդտեղ վեճ լինել չի կարող»;