ՄԻԵԴ-ը Ռուսաստանին պարտավորեցրել է 20 000 եվրո վճարել Ժաննա Նեմցովային
Մարդու իրավունքների եվրոպական դատարանն այսօր որոշում է կայացրել ««Կոմերսանտը» եւ մյուսներն ընդդեմ Ռուսաստանի» գործով: Որոշման տեքստում ասվում է, որ Բորիս Նեմցովը շահել է Յուրի Լուժկովի դեմ գործը, հաղորդում է ՏԱՍՍ-ը:
Գործը վերաբերում է «Լուժկով. արդյունքներ» գրքի հետ կապված հետաքննությանը, որը Նեմվոցը հրապարակել է 2009 թվականին Վլադիմիր Միլովի հետ համահեղինակությամբ: Այդ կապակցությամբ «Կոմերսանտ» թերթը հոդված է հրապարակել, որը գրել է Մարիա-Լուիզա Տիրմաստեն: Լուժկովը հրապարակմանը ծանոթանալուց հետո դատական հայց է ներկայացրել պատվի եւ արժանապատվության պաշտպանության մասին: Ռուսական դատարանը Նեմցովից, Տիրմաստեից եւ «Կոմերսանտ»-ից 500 000 ռուբլի է բռնագանձել:
Սակայն ՄԻԵԴ դատավորները՝ երեքշաբթի քննարկելով ներկայացված բողոքը, համաձայնել են, որ տվյալ դեպքում խախտվել է Մարդու իրավունքների եվրոպական կոնվենցիայի 10-րդ հոդվածը (կարծիքը հայտնելու ազատության իրավունք): Դատարանը վճռել է, որ Ռուսաստանը պարտավոր է եռամսյա ժամկետում 20,8 հազար եվրո վճարի Ժաննա Նեմցովային, ով գործում ներկայացնում է իր հոր շահերը:
Իր հերթին, «Ագորա» իրավապաշտպան կազմակերպության ղեկավար Պավել Չիկովը հայտնել է, որ ՄԻԵԴ-ը նաեւ անօրինական է համարել ՌԴ-ում «Կասպարով.ռու» եւ «Գրանի.ռու» կայքերի արգելափակումը, եւ ՌԴ-ին պարտավորեցրել 10 հազարական եվրո վճարել նրանց:
«Ռոսկոմնադզոր»-ը 2014-ին արգելափակել էր այդ կայքերի հասանելիությունը, որտեղ տեղադրված էին անկարգությունների, ծայրահեղականության եւ չարտոնված ցույցերի կոչեր: