Ռոբերտ Քոչարյանի գործի մեջ նրա խափանման միջոցի հարցը 4-րդական է. Հովհաննես Իգիթյան
Ռոբերտ Քոչարյանի գործի մեջ նրա խափանման միջոցի հարցը 4-րդական է. ինձ համար կարեւոր է հիմնական գործըւ, մեղադրանքը: Այս մասին, այսօր՝ հունիսի 22-ին, ԱԺ-ում լրագրողների հետ զրույցում նշեց ԱԺ «Իմ քայլը» խմբակցության պատգամավոր Հովհաննես Իգիթյանը:
«Ես մտածում եմ, թե ինչու 1,5 տարի առաջին ատյանի դատարանը չի կարողանում սկսել այդ գործի քննությունը: Ինձ դա է հետաքրքրում, որովհետեւ ես այդ ժամանակ ոչ միայն ականատես եմ եղել, այլ նաեւ հետապնդվել եմ: Ես փորձում եմ օբյեկտիվ լինել եւ չպատմել իմ ընտանիքի հանդեպ, իմ անձնական հետապնդումները: Ես ուղղակի ուզում եմ, որ գործը դատարանում քննվի եւ այն, ինչ մենք տեսել ենք, հնչեցվի եւ եթե դա չտեղավորվի մեր քրեական պատասխանատվության եւ հասարակության պատկերացումների մեջ, ապա այդ մարդն ապացուցի, որ ինքը մեղավոր չէ:
Եթե հիշում եք, Ռոբերտ Քոչարյանը սկզբից ասում էր, որ ինքը տեղյակ չէ, որ բանակը ներգրավված է պրոցեսին, հետո ասաց, որ իմ ստորագրությունը չէ, պաշտպանության նախարարինն է, ես տեղյակ չեմ, հետո ասաց՝ դա բանակ չէր եւ այլն: Բայց ինձ համար մի բան կա, որ մտահոգւչ է ոչ թե որպես պատգամավոր, այլ որպես հովհաննես Իգիթյան, երբ ես լսեցի վեռրաքննիչ դատարանի դատավորի հարցերը եւ երկխոսությունը Քոչարյանի հետ, մի բան ինձ համար անընդունելի էր: Ես տեսա, որ դատավորը տանում է դիսկուրս դեպի այն արժեքին, որը իր համար երեւի արժեք է ներկայացնում, դա գումարն է, եւ որը իր պատկերացմամբ արժեք է ներկայացնում Քոչարյանի համար: Դատավորը հարցնում էր, թե արդյոք այդ գրավի գումարը բավարար է ձեզ համար, որ դուք ափսոսաք եւ կաշկանդված լինեք, որ կորցնեք եւ որն է այդ գումարը:
Ինձ համար գումարը չէ էական, այլ այն, որ դատավորի համար արժեքը, որի պատճառով մարդը չի խուսափելու դատական պրոցեսից, գումարն է: Ես չգիտեմ՝ 2 մլրդ դրամը մեծ գումար է Քոչարյանի համար, թե ոչ, բայց այն մարդիկ, որոնք հեռացել են Հայաստանից՝ խուսափելով պատասխանատվությունից, իրենք Հայաստանում թողել են 5-10 անգամ ավելի մեծ գումարի ունեցվածք եւ փախել են: Ես չեմ ուզում, որ դա նախադեպ դառնա, որ որեւէ գողի, խարդախի, մարդասպանի խափանման միջոցն ընտրվի ոչ թե պայմանավորված հանրությանը սպռնացող վտանգով, կամ քննության խոչնդոտելով, այլ ընտրվի այնպիսի գումար, որ այդ մարդու համար զգալի լինի»,-ասաց նա:
Ինչ վերաբերում է պնդումներին, որ դա քաղաքական հետապնդում է, Իգիթյանն ասաց. «Դուք քաղաքական հետապնդման մասին հարց եք տալիս մի մարդու, որն իր կաշվի վրա զգացել է, թե դա ինչ է: Հավատացեք, այն ժամանակ քաղաքական հետապնդումը այն էր, որ մարդկանց անհայտ ձեւով վերցնում էին, եւ բոլոր դատավորներն անում էին այն, ինչ ուզում էր իշխանությունը: Արդյո՞ք հիմա դատարանները անում են այն, ինչ որ ուզում է այսօրվա իշխանությունը»: