Բոլիվիայի նախագահի պաշտոնակատարը սեպտեմբերի 6-ին ընտրությունների անցկացման մասին օրենք է ստորագրել

Բոլիվիայի նախագահի պաշտոնակատար Ժանին Անյեսը սեպտեմբերի 6-ին ընտրությունների անցկացման մասին օրենք է ստորագրել, սակայն հայտարարել է, որ դա անում է այլ թենածուների կողմից ճնշումների պատճառով, հաղորդում է ՏԱՍՍ-ը:

Նա նշել է, որ այդ օրը ընտրություններ անցկացնելը ճիշտ որոշում չի համարում կորոնավիրուսի տարածման պատճառով: «Ինձ վրա ճնշում են գործադրել նախագահի թեկնածու Կառլոս Մեսան եւ այլ քաղաքական գործիչներ, ովքեր պահանջել են ընտրություններ անցկացնել սեպտեմբերի 6-ին՝ պանդեմիայի պայմաններում»,-ասել է նա:

Նա նաեւ նշել է, որ «երբեք չի ցանկացել երկարաձգել իր լիազորությունները» եւ հանդես է եկել ընտրությունների երկարաձգման օգտին միայն երկրում համաճարակաբանական իրավիճակի պատճառով:

Բոլիվիայում գրանցվել է վարակման ավելի քան 23 հազար եւ մահվան ավելի քան 700 դեպք: «Կառավարությունը կանի ամեն ինչ, որպեսզի ընտրություններն անվտանգ անցնեն: Ես Էվո Մոռալեսին (նախկին նախագահ), Լուիս Արսեին եւ Կառլոս Մեսային խնդրում եմ, որպեսզի իրենք եւս պատասխանատվություն վերցնեն իրենց վրա, քանի որ իրենք են պահանջել պանդեմիայի թեժ շրջանում ընտրություններ անցկացնել»,-հավելել է նա:

Հունիսի 2-ին Բոլիվիայի Բարձրագույն ընտրական դատարանն առաջարկել է նախագահական եւ խորհրդարանական ընտրություններ անցկացնել սեպտեմբերի 6-ին: Հունիսի 11-ին խորհրդարանի 2 պալատները հավանություն են տվել այդ ժամկետում ընտրությունների անցկացմանը: Սակայն Անյեսը, ով այժմ կատարում է նախագահի պարտականությունները ցույցերի ֆոնին Մոռալեսի հրաժարականից հետո, միանգամից չի ստորագրել փաստաթուղթն ու պահանջել է, որպեսզի անվտանգ ընտրություններ անցկացվեն սեպտեմբերին: