Շենգավիթի ՀՅԴ կառույցը դատապարտում է համայնքային աշխատող Գեւորգ Պողոսյանի նկատմամբ բոլոր տեսակի բռնությունները
Շենգավիթի ՀՅԴ կառույցը դատապարտում է համայնքային աշխատող Գեւորգ Պողոսյանի նկատմամբ բոլոր տեսակի բռնությունները:
Տարածված հայտարարության մեջ ասվում է. «Հարգելի շենգավիթցիներ,
Մամուլից տեղեկություններ ստացվեցին, որ հունիսի 15-ին Շենգավիթ վարչական շրջանի ղեկավար Ռազմիկ Մկրտչյանը, նրա տեղակալ Համլետ Գրիգորյանը եւ օգնական Անդրանիկ Մինասյանը բռնության կիրառմամբ պահանջել են, որ վարչական շրջանի աշխատակազմի օպերատոր Գեւորգ Պողոսյանը աշխատանքից ազատման դիմում գրի։ Սույն գործով ներկայումս ՀՀ ոստիկանության Շենգավիթի բաժնի հետաքննչական բաժանմունքում նյութեր են նախապատրաստվում։
Շենգավիթ վարչական շրջանի ՀՅԴ «Արամ Երկանյան» կոմիտեն դատապարտում է համայնքային աշխատող Գեւորգ Պողոսյանի նկատմամբ ֆիզիկական եւ հոգեբանական բոլոր տեսակի բռնությունները։
Այս ընթացքում մենք կապ ենք հաստատել նրա հետ առաջարկել իրավաբանական եւ փաստաբանական մեր աջակցությունը։ Նկատի ունենալով, որ հնարավոր է հետագա ճնշումներ, փոխանցել ենք, որ եթե իրավապահները ի վիճակ չեն հոգալ Գեւորգ Պողոսյանի անվտանգությունը, ՀՅԴ «Արամ Երկանյան» կոմիտեն պատրաստ է նաեւ դա իր վրա վերցնել։
Մենք տեղյակ ենք նաեւ, որ համայանքային աշխատող Գեւորգ Պողոսյանն արդեն անցել է դատաբժշկական փորձաքննություն, եւ կոչ ենք անում ոստիկանությանը օբյկտիվ, լրիվ եւ բազմակողմանի քննել այս բռնության մասին հաղորդումը։ Մեղավորները կրելու են քաղաքական, իրավական եւ բարոյական պատասխատվություն։
Տեղեկացնում ենք, որ ՀՅԴ «Արամ Երկանյան» կոմիտեն պատրաստ է իր կարողությունների սահմաններում իրավաբանական, փաստաբանական եւ այլ կարգի օգնություն տրամադրել բոլոր շենգավիթցիներին։