Air France-ը կկրճատի մինչև 10 000 աշխատակիցների, որպեսզի հաղթահարի համաճարակի տնտեսական հետեւանքները
Air France-ը կկրճատի մինչեւ 10 000 աշխատակիցների, որպեսզի հաղթահարի կորոնավիրուսի համաճարակի տնտեսական հետեւանքները։ Ինչպես հինգշաբթի օրը, հունիսի 18-ին, հայտարարել է Le Monde թերթը, աշխատատեղերից կզրկվեն ինչպես օդաչուներ եւ անձնակազմի անդամներ, այնպես էլ վերգետնյա աշխատակիցներ։
Ֆրանսիական ԶԼՄ-ների տվյալներով՝ կրճատումների մեծ մասը (4-6 հազար աշխատատեղ) բաժին կընկնի Air France-ի վերգետնյա անձնակազմին: Air France Hop! մասնաճյուղը, որը զբաղվում է երկրի ներսում փոխադրումներով, նախատեսում է լուծել աշխատողների կեսից ավելիի (2700-ից 1500-ի) պայմանագրերը։ Ընկերության այս ուղղությունը դեռեւս ճգնաժամից առաջ դեֆիցիտային էին անվանում։ 2019-ին Air France-ը ներքին թռիչքների վրա 200 միլիոն եվրո է կորցրել:
Air France-ի աշխատակազմի կրճատումները հաստատել է նաեւ Ֆրանսիայի էկոնոմիկայի նախարար Բրունո Լե Մերը: «Air France-ը միջոցներ կձեռնարկի (կրճատելու ծախսերը)»,- France Inter ռադիոկայանի եթերում ասել է նա: Ինչպես հայտարարել է պաշտոնյան, պետությունը ընկերությանը խնդրել է ոչ թե աշխատակիցներին ստիպել հեռանալ, այլ արհմիությունների հետ պայմանավորվածություններ ձեռք բերել եւ համաձայնության գալ աշխատատեղերը կրճատելու ծրագրի շուրջ, հայտնում է RFI-ն:
Ինչպես հաստատում է Libération-ը, օդաչուներին, ովքեր տարիքի պատճառով մոտենում են իրենց կարիերայի ավարտին, զգալի փոխհատուցումներ կառաջարկեն: Այսպես են ընկերությունում փորձում խուսափել նոր գործադուլներից: Ընդհանուր առմամբ, Air France- ը կարող է կրճատել մինչեւ 400 օդաչուի, այդ թվում օդանավի հրամանատարների:
Ավելի վաղ, Ֆրանսիայի իշխանությունները հայտարարել էին, որ ազգային փոխադրողին փրկելու համար յոթ միլիարդ եվրո կծախսեն: Սակայն խոսքը անվճար օգնության մասին չէ, այլ այն վարկի մասին, որը Air France- ը ստիպված կլինի մարել առաջիկա տարիներին: Ըստ Le Monde-ի՝ ընկերությունը տարեկան պետք է միլիարդ եվրո վճարի: