Կորոնավիրուսը վերադառնում է Չինաստա՞ն. Պեկինում բռնկման մեծ ռիսկ կա, Բաոդինում ռազմական դրություն է մտցվել
Պեկինի խոշորագույն շուկայում նոր բռնկման պատճառով կորոնավիրուսի տարածման ռիսկն աճել է: Այս մասին, «Լենտա»-ի փոխանցմամբ, հայտարարել է քաղաքի կառավարության մամուլի ծառայության ղեկավար Սույ Հեցզյանը:
Ըստ նրա՝ իշխանություններն առավել վճռական միջոցներ կձեռնարկեն եւ համաճարակաբանական հետազոտություն կանցկացնեն շուկայում եւ շրջակա տարածքներում՝ վարակի աղբյուրը պարզելու համար, ինչպես կթեստավորեն մարդկանց վարակման օջախում եւ հարակից թաղամասերում:
Հունիսի 15-ին քաղաքային իշխանությունները հայտնել էին, որ անցած օրվա ընթացքում հայտնաբերվել է կորոնավիրուսով վարակման 42 նոր դեպք, որից 36-ը՝ կլինիկական դրսեւորումներով: Վեց դեպքում հիվանդությունն ընթացել է առանց ախտանիշների: Այժմ քաղաքի հիվանդանոցներում COVID-19-ով վարակված 79 մարդ կա:
Մինչեւ հունիսի 11-ը Պեկինում 56 օրվա ընթացքում կորոնավիրուսով վարակման ոչ մի դեպք չի հայտնաբերվել: Ավելի ուշ Ֆենթայ պեկինյան թաղամասի ղեկավար Չու Ցզյունվեյը հայտարարել էր պատերազմական ռեժիմի ներդրման մասին տեղական «Սինֆադի» շուկայում կորոնավիրուսի բռնկման պատճառով: Շուկայի շուրջը տեղակայված 11 բնակելի թաղամասերում բնակվող քաղաքացիներն տնից դուրս գալու իրավունք չունեն եւ պարտավոր են հետեւել ինքնամեկուսացման ռեժիմին:
Բացված երեք տարրական դպրոցներում եւ երեք մանկապարտեզներում դասերը դադարեցվել են, իսկ մնացած բոլորը պարտավոր են հետաձգել աշխատանքների վերսկսումը:
Պեկինում կորոնավիրուսի բռնկման պատճառով ռազմական դրություն է հայտարարվել Հեբեյ նահանգի հարեւան Բաոդին քաղաքում, հայտնում է «Լենտա»-ն:
Տեղական իշխանությունները շեշտում են, որ Պեկինի հետ հարեւանության պատճառով Բաոդինը պետք է հատկապես զգոն լինի: Բնակչությանը կոչ է արվել հետեւել իրենց առողջությունը եւ պաշտպանիչ միջոցներ օգտագործել: Քաղաքը գտնվում է Պեկինից 140 կմ հեռավորության վրա: Բաոդինում ապրում է ավելի քան 11 միլիոն մարդ: