Ֆրանսիայում սկսում են կարանտինից դուրս գալու երկրորդ փուլը
Ֆրանսիան երեքշաբթի սկսում է կարանտինից դուրս գալու հաջորդ փուլը: Այսօրվանից լրացուցիչ չեղարկվում են մարտի կեսին կորոնավիրուսի համավարակի պատճառով մտցված մի ամբողջ շարք սահմանափակումներ, փոխանցում է ՏԱՍՍ-ը:
Երկրում տեղաշարժը կդառնա ազատ. ուղեւորություններն այլեւս սահմանափակված չեն տանից 100 կմ շառավղով: Պաշտպանական դիմակի կրումը մնում է, սակայն հանրային տրանսպորտի բոլոր ուղեւորների համար: Ընդ որում՝ իշխանությունները չեղարկել են իրենց նախկին կարգադրությունը սոցիալական հեռավորության պահպանման նպատակով երկաթուղում եւ մետրոյում նստելատեղերի քանակի կրկնակի կրճատման մասին:
Երեքշաբթիից սմարթֆոնների մեջ կսկսի գործել հավելվածը, որը կիրազեկի վերջին 2 շաբաթում ինֆեկցիան կրողների հետ հնարավոր շփումների մասին: Փորձագետների կարծիքով՝ նման տեղեկությունը պետք է փարիզցիներին դրդի ժամանակին թեստավորվել եւ անհրաժեշտության դեպքում կրկին տնային ռեժիմի անցնել:
Ամսաթվերը հստակեցվում են
Անցած շաբաթ Ֆրանսիայի կառավարությունից նախազգուշացրել են, որ Շենգենյան գոտու ներքին սահմանները կարող են բացվել հունիսի 15-ին: Այնուհետեւ պետք է համաձայնեցվեն Եվրամիության արտաքին սահմանները բացելու ժամկետները, ճշգրիտ օրն առայժմ հայտնի չէ:
Տեղի է ունենում մշակութային կյանքի աստիճանական աշխուժացում. այս շաբաթից իրենց դռները կբացեն ֆրանսիական թանգարանները: Ըստ որում՝ ժամկետները տարբեր են. այսպես՝ հունիսի 5-ին առաջիններից մեկը այցելուներին կընդունի Շամբոր ամրոցը, Բրանլիի ափին Ժակ Շիրակի անվան ազգագրության թանգարանը՝ հունիսի 9-ին, իսկ Լուվրի եւ Ֆոնտենբլոյում թագավորական նստավայրի բացմանը ստիպված կլինեն սպասել մինչեւ հաջորդ ամիս:
Երեքշաբթի ֆրանսիական նահանգային քաղաքներում պատրաստվում են առաջին այցելուներին դիմավորել ռեստորաններն ու սրճարանները: Դրանց տերերը միլիմետրի ճշգրտությամբ չափել են սեղանների միջեւ հեռավորությունները՝ այդ տարածությունը հիմա պետք է կազմի 1 մետրից ոչ պակաս:
Բուն մայրաքաղաքում առայժմ բաց են լինելու միայն փողոցային սրճարանների տեռասները: Ռեստորանային ինտերիերները փարիզցիներին հասանելի կլինեն միայն հաջորդ՝ երրորդ փուլում:
Առաջին հարսանիքները
Չնայած Ֆրանսիայում ամառը պաշտոնապես սկսվում է ամենաերկար ցերեկն ունեցող օրը՝ հունիսի 21-ին, առաջին ամառային հարսանիքները կարող են կայանալ արդեն երեքշաբթի: Իշխանությունները որոշել են կրկին այդպիսի արարողություններ անցկացնել, սակայն՝ հյուրերի սահմանափակ թվով՝ ոչ ավել, քան 10 մարդ:
Դեռ շաբաթ օրը, չսպասելով կարանտինի չեղարկման երկրորդ փուլին, մայրաքաղաքային քաղաքապետարանը բացել էր քաղաքի այգիներն եւ պուրակները քաղաքացիների համար:
Ֆրանսիական դպրոցներն ակնկալում են այս փուլում դասարաններ վերադարձնել իրենց աշակերտների մեծ մասին: Կրթության համակարգում ինքնամեկուսացման ռեժիմից ելքը սկսվել էր մայիսի 12-ին, սակայն աստիճանաբար է ընթանում: Դասընթացներին է վերադարձել միջին դասարանների աշակերտների մոտ 30 տոկոսը եւ տարրական դասարանների 20 տոկոսը:
Վիրուսը նահանջում է, բայց չի հեռանում
Առողջապահության գլխավոր վարչությունից ստացված վերջին տվյալների համաձայն՝ մարտի 1-ին համավարակի մեկնարկի պահից սկսած մահացել է 28.830 մարդ: Հիվանդանոցներում այժմ մոտ 14.300 կորոնավիրուսով հիվանդ կա: Վերջին օրվա ընթացքում ավելի քան 90 հիվանդ է հոսպիտալացվել:
Կառավարությունը համաճարակի նահանջը կապում է ֆրանսիացիների կողմից ցուցաբերած «քաղաքացիական պատասխանատվության», ինչպես նաեւ պաշտպանիչ միջոցառումների վերաբերյալ իշխանությունների բոլոր առաջարկություններին հետեւելու հետ: Այնուամենայնիվ, զգուշավորությունը կարանտինից ելքի նոր փուլի առանցքային բառն է:
Առավել մասշտաբային փորձությունները, իհարկե, բաժին են ընկնում տնտեսության ոլորտին: Անցյալ շաբաթվա վերջին հրապարակված տվյալների համաձայն՝ երկրում ապրիլին գործազրկությունը համավարակի գագաթնակետին աճել է ավելի քան 20 տոկոսով: Տարվա վերջին ՀՆԱ-ի անկումը կարող է 8 տոկոս կազմել: