Ուհանում ապրիլի 1-ից առաջին անգամ առանց ախտանիշների կորոնավիրուսային հիվանդության ոչ մի դեպք չի հայտնաբերվել
Չինաստանի Ուհան քաղաքում ապրիլի 1-ից առաջին անգամ առանց ախտանիշների կորոնավիրուսային հիվանդության ոչ մի դեպք չի հայտնաբերվել, հաղորդում է ՏԱՍՍ-ը՝ հղում անելով քաղաքի առողջապահության եւ հիգիենայի հարցերով կոմիտեին:
«Մայիսի 31-ին Ուհանի մոտ 60 000 բնակիչ նուկլեինաթթվի թեստավորում է անցել, որի արդյունքում առանց ախտանիշների կորոնավիրուսային հիվանդության ոչ մի դեպք չի հայտնաբերվել»,-ասվում է հայտարարության մեջ:
Մայիսի 15-ից 24-ը քաղաքի իշխանությունները քաղաքի բնակչության զանգվածային թեստավորում են կազմակերպել: Այդ ընթացքում 6,5 մլն բնակչից 9 մլն նմուշ է վերցվել: Թեստավորման ընթացքում հայտնաբերվել է առանց ախտանիշների կորոնավիրուսային հիվանդության 218 դեպք:
Իրավիճակը երկրում
Չինաստանի իշխանությունները վերջին մեկ օրում գրանցել են վարակման 16 նոր դեպք արտասահմանից ժամանածների շրջանում: Երկուշաբթի հրապարակված տվյալների համաձայն՝ վերջին մեկ օրում մահվան ոչ մի դեպք չի գրանցվել, 3 մարդ դուրս է գրվել հիվանդանոցից:
Ամենից շատ նոր դեպքեր են գրանցվել Սիչուանում նահանգում:
Չինաստանում բերովի դեպքերի թիվը հասնում է 1756-ի, որից 1964-ը ապաքինվել է, եւս 62 մարդ բուժում է ստանում: Չինաստան ժամանած ոչ մի օտարերկրացի չի մահացել:
Չինաստանում կորոնավիրուսով վարակման դեպքերի թիվը հասնում է 83 017-ի, մահացել է 4634 մարդ, 78 307 մարդ ապաքինվել է:
Ապրիլի սկզբից Չինաստանի իշխանությունները հրապարակում են ախտանիշներ չունեցող պացիենտների առանձին վիճակագրություն: Եթե դրական թեստով եւ ախտանիշների բացակայությամբ մարդու մոտ, այնուամենայնիվ, հայտնվել են հիվանդության նշաններ (հազ, ջերմություն եւ այլ նշաններ), նրան հաշվառում են հիվանդացածների առանձին վիճակագրության մեջ: Անցած մեկ օրում հայտնաբերվել է կորոնավիրուսի դրական թեստով եւ հիվանդության ախտանիշների բացակայությամբ 16 մարդ: Ներկայումս բժշկական հսկողության տակ են այդպիսի 397 պացիենտներ, որոնցից 34-ը ժամանել է արտասահմանից: Ընդ որում՝ իշխանությունները չեն հրապարակում համաճարակի սկսվելուց հետո Չինաստանում գրանցված առանց ախտանիշների դեպքերի ընդհանուր թիվը:
Կորոնավիրուսի բռնկումը սկսվել է 2019 թվականի վերջին Չինաստանում եւ տարածվել աշխարհի շատ երկրներում: Մարտի 11-ին Առողջապահության համաշխարհային կազմակերպությունն այն ճանաչել է պանդեմիա: