Նոր Զելանդիայում մնացել է կորոնավիրուսով վարակված մեկ պացիենտ
Նորզելանդացի բժիշկները վերջին շաբաթվա ընթացքում կորոնավիրուսով վարակման ոչ մի նոր դեպք չեն հայտնաբերել: Ուրբաթ երկրի առողջապահության նախարարությունը հայտնել է, որ Նոր Զելանդիայում մնացել է կորոնավիրուսային ինֆեկցիայով միայն մեկ պացիենտ, փոխանցում է ՏԱՍՍ-ը:
Գերատեսչության տվյալներով՝ ներկայումս վարակվածների 98,5 տոկոսը (այսինքն՝ 1481 մարդ) ճանաչվել է ամբողջությամբ առողջացած: Բժիշկների հսկողության տակ է մնացել հիվանդության ակտիվ ընթացքով վերջին պացիենտը, բժիշկները նրա վիճակը բավարար են գնահատում, եւ նա ամբուլատոր բուժում է ստանում: Երկրում վերջին 7 օրվա ընթացքում չի հայտնաբերվել կորոնավիրուսով վարակման ոչ մի նոր դեպք: Վարակվածների ընդհանուր թիվը մնում է 1504-ի մակարդակում:
Վարակման առաջին դեպքը հայտնաբերվել էր փետրվարի 28-ին: Համավարակի ամբողջ ընթացքում ինֆեկցիայի առաջացրած բարդությունների հետեւանքով մահացել է 22 մարդ:
Մայիսի 13-ին Նոր Զելանդիայի իշխանությունները չեղարկել էին նախկինում մտցված սահմանափակումների մեծ մասը: Ներկայումս ամբողջությամբ վերականգնված է հանրային տրանսպորտի աշխատանքը, թույլատրված են երկրում ուղեւորությունները, բաց են բոլոր խանութները, արտադրությունները, հաստատությունները եւ գերատեսչությունները: Որոշ սահմանափակումներով են աշխատում հանրային սննդի եւ ծառայությունների ոլորտի ձեռնարկությունները, ինչպես նաեւ սահմանված է միջոցառումների մասնակիցների թվի լիմիտ: Հանրակրթական դպրոցներում եւ բուհերում դասերն ընթանում են նախկին ռեժիմով:
Սպասվում է, որ կառավարությունը կրկին կքննարկի հունիսի 8-ին սահմանափակումները չեղարկելու հարցը եւ կհայտարարի հունիսի 22-ից ոչ ուշ անվտանգության եւ ազգի առողջության սպառնալիքների նվազագույն մակարդակին անցնելու մասին: