Չեխիայում չեղարկել են հանրային վայրերում բժշկական դիմակներ կրելու պահանջը
Կորոնավիրուսի տարածման պատճառով Չեխիայում մարտի կեսից գործող սոցիալական սահմանափակումների ծանրակշիռ մեծամասնությունը երկուշաբթի հանվում է: Սա կապված է երկրում համաճարակային իրավիճակի բարելավմամբ, որի իշխանությունները հայտարարել են, որ կարողացել են երկրի տարածքում համավարակը հաջողությամբ հաղթահարել, փոխանցում է ՏԱՍՍ-ը:
Չեխիայի կառավարությունը ապրիլի 20-ից փուլ առ փուլ հրաժարվում է սահմանափակման խիստ միջոցառումներից, որոնք 2,5 ամիս առաջ մտցվել էին համավարակի ֆոնին: Սահմանափակումների չեղարկման խոշոր փուլի իրականացումը կսկսվի այսօրվանից, երբ չեղարկվելու է փողոցում շնչառական մարմինները պաշտպանելու պահանջը: Բժշկական դիմակներ կրելու պարտավորությունն անորոշ ժամանակով կպահպանվի հանրային փակ հաստատություններում՝ խանութներում, ինչպես նաեւ հանրային տրանսպորտում ուղեւորների համար:
Երկուշաբթի սանիտարական եւ հիգիենայի խստագույն պահանջների պահպանման պարագայում աշխատանքը կարող են վերսկսել նաեւ հյուրանոցներն ու պանսիոնատները, ֆիթնես կենտրոններն ու շոգեբաղնիքները, ռեստորաններն ու սրճարանները: Հանրային սննդի վայրերի հաճախորդները պետք է միմյանց միջեւ սոցիալական հեռավորություն պահպանեն, նույնիսկ սեղանների շուրջ, եւ դիմակներ կրեն, որը թույլ է տրվելու հանել միայն ուտելիս: Այս հաստատությունների սպասարկող անձնակազմը եւս պետք է աշխատի բժշկական դիմակներով:
Չեխիայում մայիսի 25-ից թույլատրվելու են այցելությունները ծերանոցներ եւ հաշմանդամների մասնագիտացված կլինիկաներ, տարրական դպրոցների աշակերտները կարող են վերադառնալ դասարաններ, որտեղ պարապմունքներն անցկացվելու են խմբերով՝ յուրաքանչյուրում 15 աշակերտից ոչ ավելի: Կսկսեն գործել նաեւ տաքսիի այնպիսի այլընտրանքային ծառայությունները, ինչպես Uber-ը: Դրանից բացի, թույլատրվելու է մինչեւ 300 մարդու մասնակցությամբ հանրային միջոցառումների անցկացումը:
Եթե Չեխիայում համաճարակային վիճակը շարունակի բարելավվել, ապա հունիսի 8-ից իշխանությունները նախատեսում են թույլ տալ մինչեւ 500 մարդու մասնակցությամբ հանրային միջոցառումների անցկացումը, իսկ հունիսի 22-ից՝ մինչեւ 1000 մարդու: Մինչդեռ, երկրի առողջապահության նախարարության փորձագետների կարծիքով՝ կորոնավիրուսով վարակվելու առավել մեծ վտանգ են ներկայացնում զանգվածային միջոցառումները եւ արտասահմանյան ուղեւորությունները: Դա հատկապես վերաբերում է այն երկրներին, որտեղ համավարակը զգալիորեն ավելի լուրջ է արտահայտվել, քան Ճեխիայում: Չեխիա օտարերկրացիների մուտքը նախկինի պես արգելված է: