Մի քանի օր առաջ ՀՀ-ից ծխախոտով ինքնաթիռ է մեկնել Աբխազիա. Թարգմանում եմ Վարչապետի ասածը՝ Լավ եմ անում, ինչ անում եմ, թքած ունեմ ձեր կարծիքի վրա. Մ. Մինասյան

Այդ ընտանիքը, որը մինչև կոկորդը խրված է կոռուպցիայի մեջ, այսօր ոչ միայն չի բացատրում, այլև մուննաթ է գալիս ժողովրդի վրա: Անդրադառնալով վարչապետ Նիկոլ Փաշինյանի այն հայտարարությանը, թե ինքը չի պատրաստվում հերքել մաքսանենգ ծխախոտին իր ընտանիքի՝ առնչություն ունենալու մեղադրանքը, այս մասին մայիսի 23–ին ասաց Սուրբ Աթոռում ՀՀ նախկին դեսպան Միքայել Մինասյանը «Ստի վերջը» ֆեյսբուքյան տեսաշարի վեցերորդ մասում, որը վերնագրել է «Շարունակվող անհերքելի թալանը և ստի կայսրության մեխանիկան»։

«Թարգմանում եմ, իր ասածը հետևյալն է՝ լավ եմ անում, ինչ անում եմ, թքած ունեմ ձեր կարծիքի վրա, որովհետև իրականում չբացատրելով ուղղակի ասում է՝ քանի որ ես չունեմ ոչինչ ասելու և չեմ կարող ոչինչ փաստերով հերքել, ես ուղղակի ասում եմ՝ ինչ ուզում եմ, անում եմ, լավ եմ անում։ Միայն այդպես կարելի է բացատրել պետական ապարատի տոտալ լռությունը: Քրեական գործ գոնե ձևական կարող էր հարուցվել, որը կպարզաբաներ` ովքեր են կոնկրետ այդ մաքսավորները և ում հրահանգներն են կատարել, երբ բաց են թողել Հայաստանից մաքսանենգ ծխախոտ` ձևակերպելով այն որպես «товары народного потребления»:

Դրա փոխարեն ՊԵԿ նախագահը հետևյալ բանն է ասում` քանի որ Ռուսաստանում չի հարուցվել քրեական գործ, մեզ համար այդ փաստը գոյություն չունի: Իմ սիրելի ինքնիշխան իշխանություններ, դուք սպասում եք, որ Ռուսաստանում քրեական գործ հարուցվի, որ դուք սկսեք տեղից շարժվե՞լ, կարո՞ղ է վախենում եք, որ մաքսավորները կսկսեն հանկարծակի խոսել, իսկ գուցե վախենում եք, որ մաքսավորները կոնկրետ տան Շուշաննա Ներսիսյանի անունը, որը տա Աննա Հակոբյանի անունը, կամ մաքսավորները տան Սիփան Փաշինյանի և Հրաչյա Հակոբյանի անունը: Ինձ մոտ տպավորություն է, որ նույնիսկ ձևական քրեական գործ չի հարուցվում, քանի որ կա սարսափ, բայց այդ սարսափը չի խանգարում շարունակել բիզնեսը»,- ասաց նա:

Անդրադառնաոլով ադամանդագործության շուրջ ծավալված սկանդալին՝ Միքայել Մինասյանը նշեց, որ դրա մասին ևս իշխանության ներկայացուցիչները չխոսեցին, քանի որ «ծպտյալ» շարունակում են հետևել, թե երբ կավարտվի աղմուկը:

«Կա փաստ, որ Հայաստանում գործում է մաֆիոզ համակարգ, և այդ մաֆիոզ համակարգը Հայաստանը ներքաշել է մի այնպիսի խայտառակ համակարգի մեջ, որի պատճառով մենք կրում ենք աներեւակայելի պրոբլեմներ»,- հավելեց նա:

Միքայել Մինասյանը հայտարարեց, որ օրերս մաքսանենգ ծխախոտով նոր ինքնաթիռ է մեկնել Հայաստանից, այս անգամ ՝ Աբխազիա:

«Մի քանի օր առաջ Հայաստանից ծխախոտով նոր չվերթ է մեկնում արդեն ռուսական Սոչի քաղաք, սակայն մի փոքրիկ նյուանս են մոռացել, որ ՀՀ-ն չի ճանաչում Աբխազիան որպես սուվերեն երկիր, և ՀՀ փաստաթղթերի մեջ չկա այդպիսի սուվերեն երկիր, ինչպիսին Աբխազիան է: Բայց քանի որ Նիկոլ Փաշինյանի փող աշխատելու մոլուցքը անկառավարելի է, իսկ մաքսայինը պարտավոր է հրահանգները կատարել, Աբխազիային ավելացնում են Վրաստան՝ ստեղծելով դիվանագիտական մեծ պրոբլեմներ»,- ասաց նա:

Նշենք, որ Միքայել Մինասյանը մաքսանենգ ծխախոտի մասին իր խոսքերն ապացուցող փաստաթուղթ հրապարակեց:

Մինասյանը նշեց՝ Նիկոլ Փաշինյանն օրվա մեջ զբաղված է երկու գործով․ «Գործ համար մեկ՝ նա փող է աշխատում և սեփական իշխանությունն է փորձում պահել, օրվա երկրորդ կեսին զբաղված է ղեկավարելով իր ստի կայսրությունը»,-ասաց նա՝ նշելով, թե նոր պատմությունը կարող է սկսել մի անձնավորության՝ Մանվել Տեր-Առաքելյանի ֆեյսբուքյան գրառմամբ, ով բնակվում է ԱՄՆ-ում։

«Այդ անձնավորությունը տարիներ առաջ Հայաստանից արտագաղթում է ԱՄՆ՝ իր հետևում թողնելով մեծ պարտքեր, դատական պատմություններ, բայց փորձում է սկսել նոր կյանք, որում կա նոր իրականություն։ Իմ առաջին տեսանյութից հետո նա ֆեյսբուքյան բոցաշունչ գրառում է կատարում, որի հիմքում այն է, թե ես թալանչի եմ և խլել եմ իր արդար քրտինքով վաստակած, Կարապի լճի կողքին գտնվող սրճարանը։

Այդ ֆեյսբուքյան գրառումից հետո Նիկոլ Փաշինյանի ամբողջ բուրգը մտնում է մարտի դաշտ և սկսում են այդ ստատուսը տարածել։ Այդուհետ Մանվել Տեր-Առաքելյանը գրում է երկրորդ ստատուսը, որտեղ թեթև շտկումներ է մտցնում՝ ասելով, որ իրականում ես չեմ խլել, այլ խանգարել եմ կառուցի սրճարանը»,- ներկայացրեց նա՝ ցուցադրելով 2007-ին նկարահանված տեսանյութ, որում պատմվում էր նշված շենքի կառուցման ու դրա դեմ քաղաքացիների բողոքի ակցիայի մասին։

«Ես հիշում եմ այն վրդովմունքը, որը տիրում էր Երևանում, և այն տասնյակ հազարավոր երևանցիներին, որոնք դեմ էին այդ շինարարությանը։ Բայց Նիկոլ Փաշինյանը օգտագործում է այս առիթը և սկսում է մի հիստերիկ արշավ իմ դեմ։ Այնտեղ չի եղել սրճարան, և այդ հիստերիան առոչինչ է, հիմքում բացարձակ անհեթեթություն է, Նիկոլ Փաշինյանի ամբողջ կայսրությունն աշխատում է մի փոսի վրա»,-ասաց նա։

Մինասյանը նշեց, թե այդ ամենից հետո Նիկոլ Փաշինյանը զանգահարել է ՀՔԾ պետ Սասուն Խաչատրյանին և հրահանգել հարուցել քրեական գործ։

Միքայել Մինասյանի խոսքով քնիչը հրավիրում է Մանվել Տեր-Առաքելյանի որդուն, որը հրաժարվում է ցուցմունք տալ իր դեմ և ասում է, որ այդ ամբողջ պատմությունը անհեթեթություն է:

Նա նշում է, որ ինքը այնքանով է կապված այս պատմության հետ, որ դեմ է եղել Մանվել Տեր-Առաքելյանի այս նախաձեռնությանը և իր մասնավոր կարծիքը հնմչեցրել է կառավարությունում այն ժողովի ժամանակ, որի արդյունքում քաղաքապետարանը չեղարկեց թույլտվությունները և գործարարը չկարողացավ շինություն կառուցել:

«Կարապի լիճը մեզ համար շատ թանկ է, իսկ իմ համար երկու անգամ ավելի թանկ է, որովհետև Կարապի լճի մտահաղացումը իմ պապիկինն է` Գրիգոր Հասրաթյանինն է, որ իր ընկեր ճարտարապետ Գևորգ Մուշեղյանի հետ մտածել են Երևանում այնպիսի մի վայր ստեղծեն, որտեղ մենք նկարվում ենք, խաղում են մեր երեխաները: Ես սիրում եմ Կարրապի լիճը և չեմ սիրում սուտը»,- հավելեց նա: