Փաստաբան. Ռոբերտ Քոչարյանի գործով մարդկանց մահվան հարցը չի քննարկվում նույնիսկ անուղղակիորեն

Երկրորդ նախագահ Ռոբերտ Քոչարյանի գործով մարդկանց մահվան հարցը չի քննարկվում նույնիսկ անուղղակիորեն: Այս մասին լրագրողների հետ զրույցում ասաց նախկին նախագահի փաստաբան Արամ Վարդեւանյանը:

Նրա խոսքով՝ դա տեղի է ունենում դատավոր Աննա Դանիբեկյանի ղեկավարության ներքո, ինչը դժվար է արդարադատության անվանել:

«Դա իրավական ցինիզմ է: Եթե տեսնեիք, թե ինչ է գրված անձնական միջնորդության մասով: Կարելի է ասել՝ ոչինչ գրված չէ: Դա հրապարակվել է Դատալեքսում: Դատական ակտի 92 էջ, որը մասնակիորեն կապ ունի իրավունքի հետ: Մնացածը իրավունքի հետ կապ չունի»,-նշեց փաստաբանը:

Մեկնաբանելով գործընթացը ձգձգելու փորձերի մեջ մեղադրանքներ՝ փաստաբանը հիշեցրեց, որ դատավարությունն ընթանում է 2019-ի մայիսից: «Գործը բացառիկ է. նիստի 3 ամիս չի անցկացվել «գործը Դավիթ Գրիգորյանից խլելու» օպերացիայի պատճառով: Ապա 3 ամիս բացակայեց դատավոր Աննա Դանիբեկյանը: Հարցեր կարելի է ուղղել ԲԴԽ-ին եւ դատարանի ղեկավարին: Դատարանի որոշումը հստակ ցույց է տալիս՝ ինչու»,-նշեց Արամ Վարդեւանյանը:

Նա նշեց, որ գործի 600 հատորից Ռոբերտ Քոչարյանի պաշտպանությանը ներկայացվել է միայն 76-ը: «Մնացածը ինչո՞ւ չեն ներկայացվել: Կարծում եմ՝ չեն ներկայացվել, որպեսզի մենք չտեսնենք բացթողումներն ու խախտումներ՝ կապված մարդկանց մահվան հետ: Գեղամ Պետրոսյանին մեղադրանք է առաջադրվել Զաքար Հովհաննիսյանին սպանելու մեջ: Հայտարարեցին, որ սպանությունը բացահայտնվել է: Նույնիսկ չկարողացան երկարաձգել ձերբակալությունը: Փորձագետը բառացիորեն մի քանի օրում հերքեց Պետրոսյանի մասնակցությունը: Պարկուճների մասով: Դա փորձագիտական ոլորտ է: Դրանք հիմք չեն կարող հանդիսանալ գործը բացահայտելու կամ չբացահայտելու համար: Պատկերացրեք սպանություն կենցաղային հողի վրա: Սպանողը հավաքել է պարկուճները: Եվ ի՞նչ՝ գործը արդեն բացահայտվա՞ծ է»,-ասաց փաստաբանը: