ԱՄՆ արդարադատության նախարարությունը հայտնել է Մայքլ Ֆլինի դեմ քրեական գործի դադարեցման մասին

ԱՄՆ արդարադատության նախարարությունը հայտնել է երկրի նախագահ Դոնալդ Թրամփի ազգային անվտանգության հարցերով նախկին խորհրդական Մայքլ Ֆլինի դեմ քրեական գործի դադարեցման մասին՝ հրաժարվելով դատական հետապնդումից, որը ՀԴԲ-ն նախաձեռնել էր Թրամփի ընտրական շտաբի եւ Ռուսաստանի միջեւ հնարավոր կապերի հետաքննության շրջանակում:

Գործ հարուցելու մասին որոշումն ընդունել էր նախկին հատուկ դատախազ Ռոբերտ Մյուլլերը, որը ղեկավարում էր ռուսական հետաքննությունը: Որոշվել է գործը կասեցնել, չնայած դատախազության ներկայացուցիչները վերջին 3 տարիներին պնդում էին, որ 2017 թվականի հունվարին Ֆլինը ՀԴԲ գործակալների հետ զրույցում ստել է ԱՄՆ-ում Ռուսաստանի նախկին դեսպան Սերգեյ Կիսլյակի հետ շփումների վերաբերյալ, փոխանցում է «Ամերիկայի ձայնը»:

Ֆլինը նախապես իրեն մեղավոր էր ճանաչել եւ առաջին փուլերում համագործակցել էր Մյուլլերի քննիչների հետ, սակայն հետո փոխեց տեսակետը եւ հրաժարվեց մեղքն ընդունել:

Ֆլինի դեմ գործի դադարեցման մասին արդարադատության նախարարության հաղորդագրությունից անմիջապես հետո ԱՄՆ նախագահն առանց հապաղելու մեկնաբանել է այս որոշումը՝ իր նախկին խորհրդականին բնութագրելով որպես «անմեղ մարդ» եւ Բարաք Օբամայի վարչակազմի աշխատակիցներին մեղադրելով Ֆլինին հետապնդելու մեջ: «Ես հույս ուն եմ, որ սա թանկ կարժենա [նրանց]»,- հավելել է Թրամփը:

Հինգշաբթի դատարան ներկայացրած փաստաթղթերում արդարադատության նախարարությունը հայտարարել է, որ գործը դադարեցնում է «բոլոր փաստերն ու հանգամանքները մանրակրկիտ քննարկելուց հետո..., ներառյալ նոր հայտնաբերված եւ գաղտնի տեղեկությունները»: Փաստաթղթերը հայտնվել են Associated Press-ի տրամադրության տակ:

Դեպարտամենտի հայտարարությամբ՝ եկել են այն եզրակացության, որ ՀԴԲ-ում անցկացված Ֆլինի հարցաքննությունը «կապված չէր եւ արդարացված չէր պարոն Ֆլինի դեմ ՀԴԲ հակահետախուզական հետաքննությամբ», եւ որ զրույցն «անցկացվել է առանց քննչական որեւէ օրինական հիմքերի»:

Դատախազ Ջեֆ Ջենսենը, որը քննել է Ֆլինի գործը, անցյալ շաբաթ պաշտոնապես հրահանգել է, գործը փոխանցել գլխավոր դատախազ Ուիլյամ Բարին: Դոնալդ Թրամփը հրապարակայնորեն աջակցել է դատախազի որոշմանը:

Ջենսենի հայտարարության մեջ նշված է. «Գեներալ Ֆլինի գործի քննության ընթացքում ես հանգեցի ճիշտ եւ արդարացի եզրակացության՝ գործը փակել: Ես իրազեկել եմ գլխավոր դատախազ Բարին իմ եզրահանգումների մասին, դրանց վերաբերյալ խորհրդատվություն եմ տվել, եւ նա համաձայնվել է»:

Արդարադատության նախարարության գործողությունները հիմնված են գործի ներքին վերանայման եւ Ֆլինի փաստաբանների՝ իրենց հաճախորդի դատական հետապնդման հիմքերը վիճարկելու համառ փորձերի վրա: Փաստաբանները վկայակոչում են վերջերս բացահայտված ՀԴԲ գործակալների էլեկտրոնային նամակագրությունը եւ գրառումները՝ պնդելով, որ Ֆլինին ոչ իրավաչափորեն եւ խաբեությամբ հարկադրել են հարցաքննության ժամանակ կեղծ տեղեկություններ հայտնել, որը տեղի է ունեցել Սպիտակ տանը Դոնալդ Թրամփի երդմնակալությունից հետո մի քանի օր անց: