743 մլն դրամ՝ դպրոցների, մարզադպրոցների կառուցման համար. ընդառաջել են աշխարհի չեմպիոն Սիմոն Մարտիրոսյանին

ՀՀ կառավարությունն իր այսօրվա՝ մայիսի 7-ի նիստում որոշում կայացրեց ԿԳՄՍ նախարարությանը բյուջեով հատկացված միջոցներից 743 մլն 769 հազար դրամ հատկացնել Քաղաքաշինության կոմիտեին՝ ուսումնական եւ մարզական հաստատությունների շենքային պայմանների բարելավման գործընթացի կազմակերպման համար:

ԿԳՄՍ նախարար Արայիկ Հարությունյանը նշեց, որ նշվածը բխում է ուսումնական եւ մարզական հաստատությունների նորոգման/հիմնանորոգման, կառուցման/վերակառուցման մասնաշենքերի, մարզադահլիճների կառուցման/վերակառուցման անհրաժեշտությունից, ինչպես նաեւ ՀՀ Արմավիրի մարզում ծանրամարտ մարզաձեւի համար ժամանակակից եւ արդի պահանջներին համապատասխան մարզադահլիճի կառուցման անհրաժեշտությունից։ Մասնավորապես՝ ՀՀ քաղաքաշինության կոմիտեի կողմից արդեն կնքվել են «Երեւանի Լեոյի անվան N 65 ավագ դպրոց» ՊՈԱԿ-ի, «Վաղարշապատի Մովսես Խորենացու անվան N 10 ավագ դպրոց» ՊՈԱԿ-ի, «Վեդիի ավագ դպրոց» ՊՈԱԿ-ի շենքային պայմանների բարելավման, թվով 20 հանրակրթական ուսումնական հաստատությունների մարզադահլիճների վերակառուցման, ինչպես նաեւ Հեծանվային սպորտի օլիմպիական մանկապատանեկան մարզադպրոցի եւ Հրանտ Շահինյանի անվան սպորտային, գեղարվեստական մարմնամարզության եւ ակրոբատիկայի օլիմպիական մանկապատանեկան մարզադպրոցի կառուցման նախագծանախահաշվային փաստաթղթերի մշակման աշխատանքների կատարման պետական գնման պայմանագրերը։

Որոշման ընդունման անհրաժեշտությունն ելնում է նաեւ այն հանգամանքից, որ որոշ ուսումնական եւ մարզական հաստատությունների շենքային պայմանների բարելավման համար 2019 թվականին արդեն կազմվել են նախագծեր եւ 2020 թվականին անհրաժեշտ է դառնում այդ շինությունների կառուցման/վերակառուցման աշխատանքների կազմակերպումը։ Այդ հաստատություններն են՝ Օլիմպիական հերթափոխի պետական մարզական քոլեջը, որի համար նախագծված է հանրակացարանային նոր մասնաշենքի կառուցում, ք. Վանաձորի Միքայել Թավրիզյանի անվան արվեստի պետական քոլեջը եւ «Վարդենիսի միջնակարգ դպրոց» ՊՈԱԿ-ը։

Վարդենիսի միջնակարգ դպրոցի կառուցման համար ՀՀ կառավարության 2019 թվականի նոյեմբերի 7-ի N 1553-Ն որոշմամբ հատկացվել է 70519,7 հազար դրամ գումար, սակայն պայմանագիրը կնքվել է 12․12․2019թ․ եւ ժամանակի սղության պատճառով շուրջ 47 մլն դրամ չի իրացվել եւ վերադարձվել է ՀՀ պետական բյուջե, ինչից էլ առաջացել է այս աշխատանքների համար լրացուցիչ հատկացնել 47054,8 հազար դրամ գումար։

Ք. Վանաձորի Միքայել Թավրիզյանի անվան արվեստի պետական քոլեջի հիմնանորոգման ավարտական աշխատանքների համար ՀՀ 2019 թվականի պետական բյուջեով հատկացվել է 460,004.8 հազար դրամ, սակայն քանդման աշխատանքների ընթացքում անցքավոր ծածկի սալերի հենման տեղերում, վերին հատվածներում, լայնական ուղղությամբ երեւացել են արտահայտիչ ճաքեր, ինչի հետեւանքով էլ անրաժեշտություն է առաջացել կատարել ծածկի սալերի լրացուցիչ ուժեղացման եւ կրող միջնապատերի ամբողջական, երկկողմանի տորկրետացման աշխատանքներ: Արդյունքում, նախագծային փոփոխությունների նախահաշվային արժեքը կազմել է 57468,9 հազար դրամ եւ ստացել է քաղաքաշինական փորձաքննության դրական եզրակացություն:

Դպրոցների մարզադահլիճների կառուցման նախագծային աշխատանքներ կարվեն 10 ՊՈԱԿ-ներում

«Երևանի Միքայել Նալբանդյանի անվան թիվ 33 հիմնական դպրոց»

«Երևանի Ս. Խանզադյանի անվան թիվ 184 ավագ դպրոց»

«ք. Վանաձորի Խ. Աբովյանի անվան թիվ 9 հիմնական դպրոց»

«ք. Վանաձորի Ծովակալ Իսակովի անվան թիվ 23 հիմնական դպրոց»

«Ստեփանավանի թիվ 1 վարժարան»

«Ագարակի միջնակարգ դպրոց»

«Գեղարքունիքի մարզի Գագարինի միջնակարգ դպրոց»

«Արտիմետի միջնակարգ դպրոց»

«Ալագյազի միջնակարգ դպրոց»

«Թալինի ավագ դպրոց»

Նշված հատկացման շրջանակում կֆինանսավորվի նաև Արմավիրի մարզում Ջրառատ համայնքում ծանրամարտի նոր մարզադահլիճի կառուցման նախագծային աշխատանքը, որի համար ԿԳՄՍ նախարարություն են դիմել աշխարհի և Եվրոպայի կրկնակի չեմպիոն, Օլիմպիական խաղերի արծաթե մեդալակիր Սիմոն Մարտիրոսյանն ու նրա մարզիչը: