Երգել՝ հանուն կյանքեր փրկելու. «Թովմասյան Բարեգործական Հիմնադրամի» աննախադեպ նախագիծը

«Թովմասյան Բարեգործական Հիմնադրամը» կազմակերպել է բարեգործական համահայկական աննախադեպ ինտերակտիվ օնլայն համերգային ծրագիր՝ VR տեխնոլոգիաների միջոցով, որը ուղիղ կհեռարձակվի միառժամանակ Երեւանից (Dvin Music Hall համերգային սրահից) եւ Լոս Անջելեսից՝ Հայաստանում եւ արտերկրում ապրող մեր բոլոր հայրենակիցների համար մայիսի 2-ին, ժամը 20:20 Երեւանի եւ 9:20 AM Լոս Անջելեսի ժամանակով: Նախագծի մասին NEWS.am-ը զրուցել է հիմնադրամի ղեկավար, հայտնի գործարար Արտակ Թովմասյանի հետ։

Պարոն Թովմասյան, ինչպե՞ս առաջացավ նման խոշոր եւ աննախադեպ նախագծի մտահաղացումը:

Նախաձեռնության գաղափարն առաջացավ կորոնավիրուսի հետեւանքով պայմանավորված իրավիճակից հետո, երբ օրեցօր վարակի նոր դեպքեր էին հայտնաբերվում: Մեր հիմնադրամն ուղղակի չէր կարող անտարբեր մնալ ստեղծված իրավիճակում մեր ժողովրդի եւ պետության նկատմամբ: Կորոնավիրուսն անկանխատեսելիորեն հայտնվեց ու փոխեց բոլորիս առօրյան՝ ստիպելով ապրել նոր կանոններով ու սահմանափակումներով:

Այո, մեր նախագիծն իրոք աննախադեպ է. այն ունի բարեգործական երեք ուղղվածություն՝ համերգ, աճուրդ եւ ֆլեշմոբ:

Միավորում է միանգամից մի քանի մայրցամաք. համերգին մասնակցում են մշակութային գործիչներ թե՛ Երեւանից, թե՛ Լոս Անջելեսից, թե՛ Մոսկվայից, Բեյրութից եւ թե՛ Բրյուսելից: Այն գործիչները, ովքեր գտնվում են Հայաստանում, ելույթ կունենան “Dvin Music Hall”-ում՝ պահպանելով սոցիալական հեռավորությունը (#SocialDistancing), իսկ մյուս քաղաքներից մեզ միացած հայ արտիստները ելույթ կունենան տնից՝ առցանց (#StayHome):

Համերգի ընթացքում տեղի կունենա նաեւ բարեգործական աճուրդ, որին միացել են բազմաթիվ հանրաճանաչ եւ մեր կողմից սիրված անձինք՝ նվիրաբերելով տարբեր իրեր «Միասին Մենք Կարող ենք» մակագրությամբ: Ֆլեշմոբի միջոցով մենք ուզում ենք ցույց տալ մեր միասնությունն ու ուժը. մեր ազգը շատ փորձությունների միջով է անցել, եւ սա էլ բացառություն չէ: Մեր միասնականության շնորհիվ մենք սա էլ կհաղթահարենք: Ֆլեշմոբի ընթացքում կիսվում են տեսանյութերով, որտեղ ասվում է «Միասին Մենք Կարող ենք» եւ լուսանկարներով: Բոլոր այս նյութերը կօգտագործվեն նոր տեսահոլովակում։

Դժվար չէ՞ր արտակարգ իրավիճակի եւ համընդհանուր ինքնամեկուսացման պայմաններում այսպիսի խոշոր նախագծի իրականացումը: Ի՞նչ խնդիրների եք բախվել համերգի կազմակերպման ընթացքում:

Այո, իհարկե, համաճարակի ժամանակ ամեն ինչն է դժվարանում, քանի որ կյանքն է պարալիզացվում: Դժվարություններ եղել են եւ կան, բայց հենց հիմա է այն պահը, որ մենք պետք է անենք մեր ուժերից էլ ավելին ՝ ցույց տալու , որ նույնիսկ ֆորս մաժորային նման իրավիճակը չի կարող խանգարել նման բարեգործական նախաձեռնությունը:

Մոտ 5 տասնյակ աստղերի համաձայնությունը Հայաստանում եւ ԱՄՆ-ում հեշտությա՞մբ ստացաք:

Ի սկզբանե նախատեսել էինք 25 մշակութային գործիչների մասնակցություն, բայց ինչպես գիտեք մասնակիցների թիվը արդեն կրկնապակվել է: Միացել են արդեն գործիչներ ոչ միայն Հայաստանից եւ ԱՄՆ-ից, այլեւ Ռուսաստանից, Լիբանանից, Բելգիայից: Բոլորը համաձայնել են ելույթ ունենալ առանց հոնորարի եւ դրանով իրենց աջակցությունը հայտնել այս բարեգործական նախաձեռնությանը, ինչ շատ ողջունելի է:

Համերգն անցկացվելու է VR տեխնոլոգիաների օգտագործմամբ, կմանրամասնե՞ք՝ ինչ է դա ենթադրում:

Քանի որ համերգին հետեւելու են բոլորը տնից, ոչ ոք ներկա չի գտնվելու, VR - Virtual Reality (թարգմ.՝ վիրտուալ իրականություն) տեխնոլոգիաների միջոցով մենք հնարավորություն կստեղծենք իրապես զգալ համերգասրահում եւ վճարելով մինիմալ գումար՝ սմարթֆոնի միջոցով յուրաքանչյուրը կկարողանա միանալ եւ հետեւել համերգին 360*աստիճանով: Այսինքն յուրաքանչյուրը, մասնակից դառնալով համերգին եւ վճարելով մինիմալ գումար մասնակցության համար, դառնում է բարերար։ Ոչ ոք ցավոք ապահովագրված չի այս հիվանդությունից, և յուրաքանչյուրս կարող ենք մեր լուման ներդնել այս կարևորագույն գործում։

Ո՞րն է այս նախագծի գլխավոր նպատակը, ի՞նչ խնդիր է այն լուծելու:

Առաջին հերթին եւ առաջին տեղում նախեւառաջ մարդն է, եթե մարդն առողջ է, կարող է եւ՛ սոցիալական, եւ՛ կրթական եւ մնացած այլ ոլորտներում իր գործունեությունը ծավալել: Ամբողջ հավաքագրված գումարը կուղղվի ձեռք բերելու համապատասխան շնչառական սարքեր եւ դեղորայք:

Վիրուսի հետեւանքով մահերի քանակը սարսափեցնող է ողջ աշխարհում. նույնիսկ զարգացած երկրները, ինչպիսիք են՝ Իտալիան, Իսպանիան, ԱՄՆ-ը չկարողացան կանխել հազարավոր մարդկային կորուստներ հենց սարքավորումների սակավաթիվ լինելու պատճառով: Վիրուսի բարդացման փուլում անհրաժեշտ է լինում այս ապարատների միացումը, որն օգնում է հիվանդի թոքերի աշխատանքին եւ փրկում կյանքեր: Մեր երկրում առկա են սակավաթիվ քանակի շնչառական ապարատներ, իսկ հիվանդների քանակն օրեցօր միայն աճում է: Մեր հիմնադրամը լիահույս է, որ կկարողանա ապահովել որոշակի քանակի նոր ապարատներ՝ աջակցելով ՀՀ առողջապահական համակարգին՝ փրկելով մարդկային կյանքեր:

Արդյո՞ք սա «Թովմասյան բարեգործական հիմնադրամի» առաջին նմանատիպ նախագիծն է, եւ ինչո՞վ է հիմնականում զբաղվում հիմնադրամը:

Մեր հիմնադրամը դեռ 1997 թվականից զբաղվում է բարեգործությամբ: Առաջ հայտնի էր որպես «Սոզվեզդեի», 2017-ի մայիսին այն վերանվանվեց, բայց տեսլականը մնաց նույնը. Հնարավորություններ եւ համապատասխան պայմաններ ստեղծել գիտության, մշակույթի եւ սպորտի տարբեր ոլորտների զարգացման համար մեր երկրի ու Ժողովրդի համար։