на Русском
Արշակունյաց պողոտան փակ է 
Եթե սահամանազատում տեղի ունենա, ապա Կիրանցում... 
ԱԳՆ նախարարների մասնակցությամբ նորմանդական ձեւաչափով տեսակոնֆերանսը նախատեսված է հաջորդ շաբաթ․ Լավրով
Արտաքին հարաբերությունների գերատեսչությունների ղեկավարների մասնակցությամբ նորմանդական ձեւաչափով (Ռուսաստան, Գերմանիա, Ուկրաինա, Ֆրանսիա) տեսակոնֆերանսը նախատեսված է հաջորդ շաբաթ։ Այս մասին «Առաջին ալիք»-ի «Մեծ խաղ» ծրագրին տված հարցազրույցում հայտարարել է Ռուսաստանի արտգործնախարար Սերգեյ Լավրովը, փոխանցում է ՏԱՍՍ-ը:
«Մենք իսկապես նորմանդական ձեւաչափով տեսակոնֆերանսի անցկացումը պլանավորել ենք հաջորդ շաբաթ: Երբ անցյալ տարվա դեկտեմբերին Փարիզում չորս երկրների առաջնորդները հավաքել էին, նրանք պայմանավորվեցին, որ արտաքին քաղաքականության հարցերով խորհրդականներն ու արտգործնախարարները կհետեւեն եւ կվերահսկեն այն պայմանավորվածությունների կատարմանը, որոնք ձեռք են բերվել Փարիզում»,- ասել է նախարարը:
Նորմանդական քառյակի ԱԳՆ ղեկավարների հաջորդ շաբաթ նախատեսված բանակցությունները դժվար թե արդյունք տան, ասել է Լավրովը:
«Ես կանխատեսում եմ բավական, հավանաբար, կարեւոր զրույց նախարարների մակարդակով, քանի որ մենք այս ամենի մասին բազմիցս խոսել ենք Գերմանիայում եւ Ֆրանսիայում,- ասել է նա,- Խնդրել ենք իրենց վրա վերցնել պատասխանատվությունը` ուկրաինական իշխանություններին, այնուամենայնիվ, մղելու ազնիվ եւ կառուցողական աշխատանքի: Սակայն որեւէ արդյունք, անկեղծ ասած, չեմ սպասում այս տեսակոնֆերանսից, բացի այն, որ ուկրաինացի գործընկերները, ամենայն հավանականությամբ, նորից կասեն. «Եկեք շուտով միասին հավաքվենք Բեռլինում»:
Ռուսաստանը համոզված է, որ Ուկրաինայի նախագահ Վլադիմիր Զելենսկին իսկապես խաղաղություն է ուզում Դոնբասում, սակայն առայժմ նրան թույլ չեն տալիս բարեխղճորեն շարժվել այդ ուղղությամբ, հայտարարել է Սերգեյ Լավրովը:
«Ափսոսանքով ստիպված եմ խոստովանել, որ մեր ողջ համոզվածության հետ մեկտեղ, որ նախագահ Զելենսկին անկեղծորեն ցանկանում է խաղաղություն, ինչպես եւ նա ասել է նախընտրական քարոզարշավի ընթացքում, մենք դեռեւս չենք տեսնում, որ նրան թույլ տան շարժվել դեպի 2015 թվականի Մինսկի փետրվարյան միջոցառումների համալիրի բարեխիղճ եւ ազնիվ կատարման ուղղությամբ»,- ասել է ՌԴ ԱԳՆ ղեկավարը։
Ուկրաինան սաբոտաժի է ենթարկում Փարիզում նորմանդական ձեւաչափով գագաթաժողովի որոշումների քաղաքական մասը, հավելել է Լավրովը:
