Ամերիկացի գիտնականները պարզել են արևի լույսի ազդեցությունը կորոնավիրուսի վրա
Արևի ուղիղ լույսը ուժեղ ազդեցություն է ունենում կորոնավիրուսի վրա եւ նպաստում նրա ոչնչացմանը: Նման հայտարարությամբ է հանդես եկել ԱՄՆ ներքին անվտանգության նախարարության գիտության եւ տեխնոլոգիաների հարցերով խորհրդական Ուիլյամ Բրայանը ապրիլի 23-ին կայացած բրիֆինգի ժամանակ, հաղորդում է DW-ը:
Այսպես, 21-24 աստիճան ջերմաստիճանի եւ 80 տոկոս խոնավության պայմաններում մարդու թքի մակերեւույթին հայտնված վիրուսի մասնիկների «կիսաքայքայման ժամանակահատվածը» կազմում է 2 րոպե, իսկ նույն մասնիկը 20 տոկոս խոնավություն ունեցող օդի մեջ՝ 1,5 րոպե:
Բրայանը վկայակոչել է ԱՄՆ ազգային կենտրոնի կենսաբանական պաշտպանության հարցերով մասնագետների հետազոտությունները: Գիտնականների տվյալներով, նույն ջերմաստիճանի, սակայն արեւի լույսի բացակայության պայմաններում թքի մակերեւույթին հայտնված վիրուսի մասնիկների «կիսաքայքայման ժամանակահատվածը» կազմում է 6 ժամ՝ 80 տոկոս խոնավության պայմաններում, եւ 18 ժամ՝ 20 տոկոս խոնավության պայմաններում: Իսկ 20 տոկոս խոնավություն ունեցող օդի մեջ այդ ժամանակահատվածը կազմում է 1 ժամ:
Հետազոտության արդյունքները դեռ չեն հրապարակվել: Կառույցի մասնագետները ընդգծում են, որ կորոնավիրուսի հարուցիչի փոխանցման շղթայում նախկինի պես կան անհայտ օղակներ: