Վրաստանում աշխատանքը կորցրած քաղաքացիների նպաստը ապրելու համար անհրաժեշտ նվազագույնից քիչ չի լինի
Վրաստանի քաղաքացիները, որոնք կորոնավիրուսի պատճառով աշխատանքը կորցրել են, վեց ամիս պետությունից դրամական նպաստ կստանան, որը ապրելու համար անհրաժեշտ նվազագույնից ավելի կլինի: Այս մասին այսօր ճեպազրույցում հայտարարել է վարչապետ Գեորգի Գախարիան, փոխանցում է «Նովոստի- Գրուզիան»:
Վարչապետն ընդգծել է, որ դրամական նպաստի չափը ավելին կլինի, քան նախկինում բարձրաձայնված գումարը՝ 150 լարի (47 դոլար), քանի որ դա ակնհայտորեն քիչ է ապրելու համար անհրաժեշտ նվազագույնից:
Գախարիան խոստացել է, որ քաղաքացիների օգնության սոցիալական փաթեթի կոնկրետ գումարը հայտնի կդառնա օրերս:
«Անհրաժեշտ է պարզել մեծ թվով գործոններ՝ ով է կորցրել աշխատանքը, ով է ինքնազբաղված, ինչպես նրանց նույնականացնել եւ շատ այլ բաներ: Մենք պետք է հասկանանք նաեւ այն, որ անհրաժեշտ է փոխել շատ չափանիշներ, այդ թվում՝ սոցիալապես անպաշտպան անձանց որոշելու չափանիշները: Քանի որ առանց աշխատանքի եւ գոյատեւման միջոցների մնացած մարդը դառնում է սոցիալապես անպաշտպան: Անհրաժեշտ է հիշել նաեւ այն, որ այս ճգնաժամը մեկ կամ երկու օր չի տեւելու: Սա ճգնաժամ է, որի մեջ կարող ենք լինել մեկ տարի կամ նույնիսկ 1,5»,- ասել է Գախարիան:
Երկրի վարչապետը նաեւ նշել է, որ օգնության փաթեթների մասին խեսելն անլուրջ է՝ առանց Արժույթի միջազգային հիմնադրամի եւ դոնորների հետ չափանիշների քննարկման:
Վրաստանում ապրելու համար անհրաժեշտ նվազագույնը փետրվարին կազմել է 199 լարի (63 դոլար). սա նվազագույն բյուջեն է, որը ներառում է մեկ մարդու ծախսերը սնունդի եւ կոմունալ ծառայությունների համար:
Գախարիան վստահ է, որ բնակչությունը սննդամթերքի պակաս չի ունենա: Կառավարության գլխավոր խնդիրն է քաղաքացիների հասանելիությունն այդ մթերքներին ապահովել ֆինանսական առումով:
«Չնայած շատ տեղեկություններ են տարածվում այն մասին, որ «Եվրասիական միությունն» արգելել է մթերքների արտահանումը եւ այլն, ասեմ, որ սննդամթերքի մատակարարումների ոչ մի վտանգ չկա, դա հատկապես վերաբերում է սննդամթերքի 9 հիմնական տեսակներին, որոնց ցանկը հայտնի է: Երկրում սննդամթերքի հետ կապված ոչ մի խնդիր չի լինի նաեւ ապագայում: Մենք, կառավարությունը, պետք է հնարավոր ամեն ինչ անենք, որ մեր քաղաքացիներն իրենց գնումների համար ֆինանսական սահմանափակումներ չունենան»,- ասել է Գախարիան:
Վրաստանի կառավարությունը խոստացել է վերահսկել սպառման 9 հիմնական սննդամթերքների գները, ինչպես նաեւ երկրում դրանց պաշարները. դրանք են՝ բրինձը, մակարոնային արտադրանքը, արեւածաղկի ձեթը, ալյուրը, շաքարը, ցորենը, կաթի փոշին, հնդկաձավարը եւ լոբազգիները:
Վրաստանում կորոնավիրուսի համավարակի պատճառով արտակարգ դրությունը երկարացվել է մինչեւ մայիսի 10-ը: Ապրիլի 15-ից նաեւ արգելվում է 4 քաղաք մուտքն ու ելքը՝ Թբիլիսի, Ռուսթավի, Բաթումի եւ Քութայիսի: