Անգլիայի եկեղեցին կողոպտիչների վախից արժեքավոր իրերը տեղափոխել է Թաուեր

Անգլիայի եկեղեցին միլիոնավոր ֆունտ արժողությամբ թանկարժեք իրերը տեղափոխել է լոնդոնյան Թաուեր`մտավախություններ ունենալով, որ եկեղեցական ունեցվածքը կարող է թալանվել COVID-19-ի հետ կապված մեկուսացման ռեժիմի պայմաններում, հայտնում է Telegraph թերթը:

Ավելի վաղ Անգլիայի եկեղեցու հոգեւոր առաջնորդ, Քենթերբերիի արքեպիսկոպոս Ջասթին Ուելբին հաստատել էր, որ Բրիտանիայում տաճարները պետք է փակ մնան` կորոնավիրուսային համաճարակի պատճառով:

Ըստ թերթի` եկեղեցու ծառայողները հավաքել են «եկեղեցական պարագաները» եւ մի քանի շաբաթվա ընթացքում տեղափոխել են դրանք Թաուեր: Արժեքավոր իրերի թվում «հազվագյուտ եւ անսովոր» արծաթեղեն, նկարներ, արվեստի առարկաներ եւ Լոնդոնի 400 եկեղեցիներից հավաքված արտեֆակտեր:

Եկեղեցու ներկայացուցիչները հաստատել են, որ «Լոնդոնի եկեղեցիներից հավաքված արժեքավոր իրերը տեղափոխվել են մի քանի անվտանգ վայր»: Դա անհրաժեշտ էր` «դրանց անվտանգությունը եկեղեցիներից հեռու պահպանելու համար, քանի դեռ դրանք փակ են մնում»:

Թերթը հավելում է, որ ճգնաժամի ժամանակ պատմական արժեք եւ կարեւորություն ունեցող իրերը պատմականորեն տեղափոխվել են լոնդոնյան Թաուեր: Այդպիսով եկեղեցականները ցանկանում էին փրկել դրանք: Նման տեղափոխումներ եղել են Միջին դարերում եւ Նոր ժամանակներում տեղի ունեցած ցնցումների, ինչպես նաեւ երկու համաշխարհային պատերազմների ժամանակ, հայտնում է «ՌԻԱ Նովոստի»-ն:

Արժեքավոր իրերի տեղափոխումը նախաձեռնել է Լոնդոնի դիոցեզը: Դրա ներկայացուցիչը, մասնավորապես, պարբերականին հայտնել է, որ «նույնիսկ լոնդոնցի հոգեւորականները ստույգ չգիտեն, թե որտեղ են պահվում իրենց եկեղեցիների իրերը»: Նրա խոսքով, գործողության մասին գիտեր ոստիկանությունը, որն անցկացնելիս պահպանվել է սոցիալական հեռավորություն:

Անգլիկան եկեղեցու ներկայացուցիչները ցանկանում են մտցված մեկուսացման ռեժիմում վանդալներից եւ կողոպուտից պաշտպանել արժեքավոր օբյեկտները, հայտնում է Telegraph-ը: Ավելի վաղ ոստիկանությունը նախազգուշացրել էր, որ կարանտինի ժամանակ հանցագործները մեքենաներ ու մետաղի ջարդոն են գողանում: Այս պատճառով ստեղծված իրավիճակում բոլոր դուրս բերված իրերը, որոնց մեծ մասը մի քանի հարյուր տարվա է, մինչեւ մեկուսացման ավարտը պահպանվելու են Թաուերում:

Երկրի առողջապահության նախարարությունը կիրակի հայտնել էր, որ Մեծ Բրիտանիայում COVID-19-ի հետեւանքով մահացածների թիվն անցել է 10 հազարը, վարակվածների ընդհանուր թիվն է 84 հազար: