Երևանի խնդրանքով Ռուսաստանը կարտահանձնի նախկին պատգամավոր Լևոն Սարգսյանին

Ռուսաստանի գլխավոր դատախազությունը բավարարել է հայաստանցի գործընկերների խնդրանքը` ավազակության համար հետախուզվող Հայաստանի խորհրդարանի նախկին պատգամավոր Լեւոն Սարգսյանի արտահանձնման վերաբերյալ, գերատեսչունում հայտնել են «ՌԻԱ Նովոստի»-ին:

2019 թվականի նոյեմբերին ՀՀ ոստիկանության լրատվական ծառայությունը հայտնել էր Զելենոգրադում Սարգսյանի ձերբակալման մասին, որը ՀՀ իրավապահ մարմինների կողմից հետախուզվում էր 2018 թվականի հոկտեմբերի 1-ից` ավազակության, ինչպես նաեւ առանձնապես խոշոր չափերով գույք հափշտակելու նպատակով կազմակերպված խմբի կողմից հանցավոր համագործակցությանը մասնակցելու կասկածանքով: Այս հոդվածներով նախատեսված առավելագույն պատիժը մինչեւ 15 տարի ժամկետով ազատազրկումն է:

Մարտին ՀՀ գլխավոր դատախազության ներկայացուցիչ Գոռ Աբրահամյանն հայտարարել էր, որ ռուսական կողմը որոշել է Սարգսյանին արտահանձնել Երեւանին:

«Հայաստանի Հանրապետության գլխավոր դատախազության հայցը նրա արտահանձնման վերաբերյալ ուղղվել է Ռուսաստանի Դաշնության գլխավոր դատախազություն` միջազգային պայմանագրով սահմանված ժամկետում եւ անհրաժեշտ փաստաթղթերի հետ միասին: 2020 թվականի մարտի 19-ին Ռուսաստանի Դաշնության գլխավոր դատախազությունը որոշում է կայացրել բավարարել ՀՀ գլխավոր դատախազության` Լ. Սարգսյանի արտահանձնման մասին պահանջը` իրեն մեղսագրվող հանցագործությունների համար քրեական պատասխանատվության ենթարկելու նպատակով»,- նշել են գերատեսչությունում:

Սարգսյանը Հայաստանի խորհրդարանի մի քանի գումարումների պատգամավոր է եղել, նախկին իշխող Հայաստանի հանրապետական կուսակցության անդամ: