Կառավարության պարզաբանումը Politik.am-ի աղմկալի հոդվածի վերաբերյալ. Վարչապետը խոսել է միայն բարձրաստիճան պաշտոնյաների մասին

Կառավարությունը պարզաբանում է տարածել կապված նախօրեին ՀՀ վարչապետ Նիկոլ Փաշինյանի հայտարարության հետ, թե բարձրաստիճան պաշտոնյաների պարգեւատրումների ընդհանուր ֆոնդը կազմում է 1 միլիարդ դրամ:

Պարզաբանման մեջ ասվում է.

«Հարգելի գործընկերներ,

Վարչապետ Նիկոլ Փաշինյանի ապրիլի 6-ի ֆեյսբուքյան ասուլիսում արած հայտարարության հետ կապված, ըստ որի՝ բարձրաստիճան պաշտոնյաների պարգեւատրումների ընդհանուր ֆոնդը կազմում է 1 միլիարդ դրամ, տարբեր անձանց կողմից ներկայացվում են մանիպուլյատիվ մեկնաբանություններ եւ տեղեկատվություն:

Եվս մեկ անգամ ընդգծում ենք, որ վարչապետը խոսել է բացառապես բարձրաստիճան պաշտոնյաների պարգեւավճարների մասին, այլ ոչ թե ընդհանուր պետական կառավարման համակարգի աշխատակիցների:

Ինչպես հայտնի է, նախորդ տարվանից սկսած բոլոր նախարարությունների եւ գերատեսչությունների աշխատակիցների պարգեւատրման համար պետական բյուջեով նախատեսվել են հատկացումներ՝ տվյալ գերատեսչության աշխատավարձային ֆոնդի 30 տոկոսի չափով, որոնք հատկացվում են պետական կառավարման համակարգի բոլոր ներկայացուցիչներին՝ սկսած ամենակրտսեր պաշտոններ զբաղեցնող անձանցից, վերջացրած բարձրաստիճան պաշտոնյաներով: Այսինքն, պարգեւավճարները տրամադրվում են մեր հազարավոր քաղաքացիներին: Ընդհանուր առմամբ, այո, պետական կառավարման համակարգում պարգեւատրումների ֆոնդը տարեկան կազմում է ավելի քան 25 միլիարդ դրամ, որի ընդամենը նվազագույն մասն է միայն ուղղվում բարձրաստիճան պաշտոնյաների՝ նախարարների, փոխնախարարների եւ գլխավոր քարտուղարների պարգեւատրմանը»:

Ավելի վաղ Politik.am-ը «Փաշինյանը կրկին կեղծ տվյալներ է ներկայացրել․ 43 մլն դոլար պարգևատրում» վերտառությամբ հոդվածում գրել էր. «Ֆեյբուքյան ուղիղ եթերում՝ ապրիլի 6-ին , վարչապետ Նիկոլ Փաշինյանն արդարացրեց արդեն շուրջ երկու տարի պետական համակարգի բազմամիլիոնանոց պարգեւատրումների աշխատաոճը ու հրապարկեց թվեր, որոնք արագ հերքվեցին փորձագիտական շրջանակների կողմից։

Վարչապետը հայտարարեց, որ բարձրաստիճան պաշտոնյաներին տարեկան իր որոշմամբ տրվել է 1 միլիարդ դրամ, որը թոշակառուներին բաժանվելու դեպքում նրանց կենսաթոշակը ամսական կավելանար միայն 168 դրամով։

Միանգամից նկատենք, որ վարչապետ Նիկոլ Փաշինյանը կրկին կեղծ տվյալներ է ներկայացրել։ Փաշինյանը պարգևատրումների իրական չափից 21 անգամ փոքր թիվ է ներկայացրել։ Հիշեցնենք, ամիսներ առաջ որ Yerevan.today լրատվական կայքը պաշտոնական փաստաթղթերի վրա հիմնված ուսումնասիրություն էր իրականացրել և պարզել, որ 2019 թվականին տրվել է 21 մլրդ 500 մլն դրամ (43 մլն դոլար) պարգևավճար»։

Կառավարության պարզաբանման մեջ նաև ասվում է. «Վարչապետը բազմիցս հրապարակային հայտնել է իր դիրքորոշումն այս հարցերի վերաբերյալ եւ հռչակել քաղաքական կուրս, ասելով նաեւ, որ պետք չէ նախարարին մեղադրել կենսաթոշակառուից բազմապատիկ անգամ ավել աշխատավարձ ստանալու մեջ, քանզի նախարարի աշխատանքի որակից է կախված թոշակառուի հետագա բարեկեցության մակարդակը:

Հիշեցնենք նաեւ, որ հեղափոխությունից հետո՝ վերջին մեկուկես տարվա ընթացքում, Հայաստանում հարյուր հազարավոր քաղաքացիների աշխատավարձների, թոշակների, նպաստների բարձրացումներ են տեղի ունեցել, պրոցեսը շարունակվում է։

Հորդորում ենք այս եւ այլ հարցերի շուրջ զերծ մնալ մանիպուլյատիվ մեկնաբանություններից եւ կեղծ տեղեկատվություն ներկայացնելուց:

Երեկ ուղիղ եթերում վարչապետն ընդգծել էր, որ իր որոշմամբ մարտ ամսվա համար պետական բարձրաստիճան պաշտոնյաները պարգեւավճար չեն ստացել:

Այնուամենայնիվ, անդրադառնալով պետական բարձրաստիճան պաշտոնյաների աշխատավարձերի բարձրացմանը պարգեւավճարների հաշվին՝ վարչապետը հիշեցրել էր, որ նախկինում, որպես ընդդիմադիր գործիչ, պետական պաշտոնյաների աշխատավարձերի բարձրացումը, պարգեւավճարները ցինիզմ է որակել, քանի որ այդ բոլոր պաշտոնյաներին տրված է եղել արտոնություն՝ կաշառքներով, հովանավորչությամբ, կոռուպցիոն այլ լծակներով փողեր աշխատել եւ ըստ էության թալանել երկիրը:

«Այժմ պետական կառավարման համակարգի առաջ դրված է խստագույն խնդիր եւ յուրաքանչյուրը գիտի, որ կոռուպցիայում ներգրավվելու պարագայում կպատժվի: Բարձրաստիճան պաշտոնյաների աշխատանքի արդյունավետության շնորհիվ է նաեւ հնարավոր եղել 1 մլն 90 հազար մարդու աշխատավարձ, թոշակ, նպաստ բարձրացրել, 2018-ից ի վեր Հայաստանի պետական բյուջեի եկամուտներն ավելացնել 1 մլրդ 100 մլն դոլարով:

Կարծում եմ, որ մենք հիմա պետք է ազնիվ, արդար պետական ծառայության վարկանիշը բարձրացնենք: Պետական կառավարման համակարգում պետք է աշխատավարձերի շարունակական բարձրացում տեղի ունենա, որովհետեւ բազմաթիվ խնդիրներ չեն լուծվում մի պարզ պատճառով, որ անհրաժեշտ մասնագիտական հմտություն ունեցող կադրեր հաճախ հնարավոր չի լինում ներգրավել պետական կառավարման համակարգ»,- նշել է Նիկոլ Փաշինյանը:

Ավելի վաղ հայտնել էինք, որ ֆեյբուքյան ուղիղ եթերում՝ ապրիլի 6-ին , վարչապետ Նիկոլ Փաշինյանը հայտարարել էր, թե բարձրաստիճան պաշտոնյաներին տարեկան իր որոշմամբ տրվել է 1 միլիարդ դրամ, որը թոշակառուներին բաժանվելու դեպքում նրանց կենսաթոշակը ամսական կավելանար միայն 168 դրամով։