Կարանտինը Փարիզի շրջանում օդը մաքուր է դարձրել․ Le Monde

Ֆրանսիայի Իլ դե Ֆրանս շրջանում օդի որակը բարելավվել է 30 տոկոսով, հայտնում է RFI-ը՝ հղում կատարելով Le Monde-ին։ Այդ կտրուկ բարելավումը գլխավորապես կապված է ավտոմեքենաներից և տրանսպորտի այլ միջոցներից վնասակար արտանետումների կրճատման հետ։

Le Monde-ը հղում է կատարում Airparif ընկերության հետազոտության արդյունքներին, որոնք հրապարակվել են մարտի 25-ին։ Փորձագետների չափումների համաձայն, փարիզյան շրջանում օդի որակը բարելավվել է 20-30 տոկոսով։ Մասնագետները օդի նմուշը համեմատել են մարտի սովորական ցուցանիշների հետ։

Նրանք պարզել են, որ այդ բարելավումը կապված է ազոտաթթվի ավելի քան 60 տոկոս նվազման հետ։ Մարտի 17-ին այն ընկել էր 41 տոկոսով, իսկ ուրբաթ օրը՝ արդեն 64 տոկոսով։ Airparif-ի ղեկավար Կարին Լեժեն այս նվազումը բացատրում է տրանսպորտային միջոցների և ավիահաղորդակցության կտրուկ կրճատման հետ։ Փորձագետը նշում է, որ ճանապարհներին երթեւեկության ինտենսիվությունը նվազել է 70-90 տոկոսով։ Բացի այդ, Airparif-ը գրանցել է CO2-ի արտանետումների 30 տոկոս նվազում։ Հիշեցնենք, որ նման միտում NASA-ի փորձագետները կարանտինի սահմանումից հետո գրանցել են Չինաստանում և Իտալիայում։

Սակայն մասնագետներն ընդգծում են, որ օդում մանր մասնիկների պարունակությունը, որոնք ամենավտանգավորն են մարդու առողջության համար, չի փոխվել։ Հետազոտության հեղինակները ենթադրում են, որ դրանց չափը պահպանվում է նախկին մակարդակի վրա, քանի որ գյուղատնտեսական գործունեությունը շարունակվում է և ջեռուցման սեզոնը չի վերջացել։