Փողոց դուրս եկած մարդիկ պետք է հստակ բացատրություն ունենան, թե ուր են գնում. ունենան անձը հաստատող փաստաթուղթ. Փաշինյան
Այսօրվանից առնվազն մեկ շաբաթով երկրում գործում են նոր սահմանափակումներ, ինչը նշանակում է, որ հազարավոր ձեռնարկությունների աշխատանքներ դադարեցվելու են և թույլատրվելու է միայն կենսական անհրաժեշտ կազմակերպությունների գործունեությունը և որ կարևոր է՝ մարկանց միայն կենսական կարևոր տեղաշարժը: Այս մասին, այսօր՝ մարտի 24-ին, իր ուղերձում նշել է ՀՀ վարչապետ Նիկոլ Փաշինյանը:
«Փողոց դուրս եկած մեր քաղաքացիները պետք է հստակ բացատրություն ունենան, թե ուր են գնում, և դա պետք է տեղավորվի կենսական անհրաժեշտ տեղաշարժի տրամաբանության մեջ: Տեղաշարժի մեջ գտնվող մեր բոլոր քաղաքացիները պետք է ունենան անձը հաստատող փաստաթուղթ: Պարետատունը կսահմանի քաղաքացու կողմից տեղաշարժի ձևաթուղթ լրացնելու պարտադիր պայման:
Ինչ վերաբերում է կենսական անհրաժեշտ գործունեությունների տեղաշարժերի ցանկերին, պարետատունը դրանք արդեն հրապարակել է:
Այսօրվանից մեկ շաբաթով փակ են բոլոր ռեստորանները և սրճարանները, աշխատելու են խանութները, դեղատները, բանկերը և մեր քաղաքացիները հնարավորություն են ունենալու այցելել դեղատուն, խանութ ու բանկեր: Բայց ուզում եմ բոլորիդ խնդրել, որ առավելագույնս օգտվեք օնլայն ծառայություններից՝ օնլայնգնումներ, օնլայն վճարումներ և օնլայն բանկինգ ծառայություններ:
Այս ամիս թոշակառուներն իրենց թոշակները ստանալու համար կարիք չեն ունենա գնալ փոստային բաժանմունքներ, նրանք թոշակները կստանան առձեռն՝ իրենց բնակարաններում, «Հայփոստի» շրջիկ խմբերի կողմից: Նաև սահմանվել է, որ բոլոր խանութները, դեղատները, բանկերը առավոտյան 10-12-ը կսպասարկեն միայն 65-ից բարձր տարիք ունեցող մեր քաղաքացիներին»,– ասաց նա:
Փաշինյանը կոչ արեց երկու հգուց ավել չհավաքվել անգամ բակերում, զրուցարաններում կամ թաղերում: Տանը մնալու ժամանակ պահպանել հակահամաճարակային հիգիենայի կանոնները և հետևել Առողջապահության նախարարության հրահանգներին:
Ըստ Վարչապետի՝ այս պահի դրությամբ կորոնավիրուսի դեպքեր ունենք Երևանում, Արմավիրի, Արարատի, Արագածոտնի, Կոտայքի, Սյունիքի, Շիրակի և Լոռու մարզերում:
Նրա խոսքով, այս դեպքերի ծագումնաբանությունը հայտնի է. «Կորոնավիրուսի տարածման երեք զարգացող ճյուղ ենք ունեցել՝ Իրանից ժամանած մեր հայրենակիցները, Էջմիածնից ժամանած մեր հայրենակիցները և Երևանի արտադրամասի մեր հայրենակիցները: Ըստ էության, մեր գործողությունների արդյունքում հաջողվեց կանգնեցնել Իրանի և Էջմիածնի ճյուղերի հետագա զարգացումը և պայքարում էինք Երևանի արտադրամասի ճյուղի հետագա զարգացումը կանխելու համար:
Մարտի 23-ի ախտորոշումների վերլուծությունը սակայն ցույց է տալիս, որ Երևանի արտադրամասի ճյուղը հնարավոր է մեզ համար անվերահսկելի զարգացում է ունեցել, քանի որ նոր դեպքեր ենք արձանագրել Երևանի և Չարենցավանի այլ արտադրամասերում: Դա հանգեցրեց եզրակացության, որ պետք է մեկ շաբաթով շատ ավելի խիստ սահմանափակումներ կիրառենք:
Փաշինյանը շեշտեց նաև, որ արժույթի միջազգային հիմնադրամն արդեն իսկ արձանագրել է, որ 2020 թվականն անկումային է լինելու համաշխարհային տնտեսության համար:
«Որոշ գնահատականների համաձայն անկումն ավելի խորն է լինելու, քան անգամ 2008-2009 թվականների տնտեսական ճգնաժամի ժամանակ: Հայաստանի պարագայում կանխատեսումները այս պահի դրությամբ դրական են, բայց ակնհայտ է, որ մենք կորցնելու ենք աճի այն տեմպը, որը համատեղ աշխատանքի արդյունքում ձեւավորեցինք 2019 թվականին:
Բայց այս վիճակը մենք ընկալում ենք ոչ թե որպես ողբերգություն, այլ որպես նոր հնարավորություն համաշխարհային տնտեսության մեջ Հայաստանի տեղադիրքը փոխելու, տնտեսական հեղափոխության մեր օրակարգն ավելի արդյունավետ եւ կրկնապատիկ տեմպով կյանքի կոչելու համար:
Աշխարհում համաշխարհային ՀՆԱ-ի 3 տրլն դոլարանոց անկում է լինելու, այսինքն համաշխարհային շուկայում այդքան տեղ է ազատվելու և մենք այսօրվանից պետք է մեզ տրամադրենք, որ այդ ազատված տեղի առնվազն 30 մլրդ դոլարանոց հատվածը հենց Հայաստանը պետք է զբաղեցնի և դա պետք է լուծի առաջիկա 5 տարվա ընթացքում:
Սա նշանակում է, որ մենք խնդիր ենք դրել զբաղեցնել ազատվող շուկայի մեկ տոկոսը, և ես հավատում եմ, որ մենք կարող ենք դա անել»:
Նա ընդգծեց, որ կորոնավիրուսի ամենաճգնաժամային իրավիճակում Հայաստանը պարենային ապրանքների դեֆիցիտ չունեցավ և չունի, ինչն ունեցան բազմաթիվ զարգացած երկրներ: