Սաուդյան Արաբիայում կորոնավիրուսի պատճառով պարետային ժամ է հայտարարվել
Երկուշաբթի օրվանից Սաուդյան Արաբիայում երեք շաբաթ ժամկետով պարետային ժամ է հայտարարվել: Համապատասխան հրամանն արձակել է Թագավոր Սալման բեն Աբդել Ազիզ Ալ Սաուդը, փոխանցում է Թագավորության SPA լրատվական գործակալությունը:
Փողոց դուրս գալու արգելքն ուժի մեջ կմտնի երկուշաբթի` մարտի 23-ից, երեկոյան 7-ից մինչեւ առավոտյան 6-ը 21 օրվա ընթացքում: «Պարետային ժամի պահպանումը վերահսկում է ՆԳՆ-ն: Քաղաքացիական պաշտպանության ծառայության, երկրի ռազմավարական օբյեկտների աշխատակիցները, ինչպես նաեւ իրավապահ մարմինների ներկայացուցիչները, զինծառայողներն եւ լրագրողները, առողջապահական աշխատողները, որոնք պետք է անընդհատ լինեն իրենց աշխատատեղերում, այսուհետ դուրս են գալիս սահմանափակումային միջոցների ազդեցությունից»,- նշվում է միապետի հրամանում, փոխանցում է ՏԱՍՍ-ը:
Մինչ այժմ Սաուդյան Արաբիայում գրանցվել է նոր կորոնավիրուսի ավելի քան 500 դեպք: Հիվանդության դեմ պայքարի շրջանակներում մարտի սկզբին թագավորության իշխանությունները անորոշ ժամանակով հետաձգել էին Ումրան` փոքր Հաջը, իրենց քաղաքացիների եւ երկրում ապրող օտարերկրացիների համար: Լուրջ սահմանափակումներ էին սահմանվել նաեւ օտարերկրացի ուխտավորների կողմից Ումրա իրականացնելու համար, որը, ի տարբերություն մեծ Հաջի, կարող է կատարվել տարվա ցանկացած ժամանակ:
Հետաձգվել են բոլոր հանգստի եւ մարզական միջոցառումները, նախատեսված գագաթնաժողովներն ու գիտաժողովները, իսկ միջազգային օդային հաղորդակցությունը մարտի 15-ից երկու շաբաթով դադարեցվել է: Մարտի 17-ին Թագավորությունում հայտարարվել էր բոլոր մզկիթներում զանգվածային աղոթքների դադարեցման մասին, ներառյալ` ուրբաթօրյա նամազների: Սկզբում բացառություն էր արված միայն Մեքքայի եւ Մեդինայի երկու հիմնական իսլամական տաճարների համար, սակայն մարտի 20-ին անորոշ ժամկետով փակվեցին նաեւ դրանք:
Նոր կորոնավիրուսի բռնկումը գրանցվել էր 2019-ի վերջին Կենտրոնական Չինաստանում, այնուհետեւ տարածվել էր ավելի քան 150 երկրում եւ Առողջապահության համաշխարհային կազմակերպության կողմից ճանաչվել է որպես համաճարակ: Վերջին տվյալների համաձայն՝ աշխարհում վարակվել է ավելի քան 300 հազար մարդ, գրանցվել է ավելի քան 13 հազար մահ: Ռուսաստանում գրանցվել է վարակի 367 դեպք: