Այսօր Օդերևութաբանական համաշխարհային օրն է
Համաշխարհային օդերևութաբանական կազմակերպության (ՀՕԿ) նախաձեռնությամբ ՄԱԿ-ի հովանու ներքո ամեն տարի մարտի 23-ին նշվում է Օդերևութաբանական համաշխարհային օրը (World Meteorological Day): Օրվա տոնակատարությանը մասնակցում է 193 պետություն և ВМО տարածք, գրում է Calend.ru-ն:
1950 թվականի մարտի 23-ին ուժի մեջ է մտել Համաշխարհային օդերևութաբանական կազմակերպության (World Meteorological Organization) Կոնվենցիան, որում հռչակվել է Կազմակերպության հիմնումը: Տոնի կարգախոսն է դարձել՝ «Եղանակը, կլիման և ջուրը տեղեկատվական դարաշրջանում»: Բուն տոնը նշվում է 1961 թվականից:
Համաշխարհային օդերևութաբանական կազմակերպությունը նախևառաջ զբաղվում է եղանակի, կլիմայի և ջրի խնդիրներով, իսկ երկրները, որոնք անդամագրվել են Կազմակերպությանը, արդեն երկար տարիներ հաջողությամբ համագործակցում են՝ փոխանակելով մթնոլորտի, ցամաքի, ծովերի, օվկիանոսների, գետերի վիճակի մասին օպերատիվ տվյալները, որոնց հիման վրա էլ կազմվում են եղանակի տեսություններն ու վտանգավոր հիդրոօդերևութաբանական երևույթների մասին նախազգուշացումները: ՀՕԿ-ի առավել խոշոր ձեռքբերումներից է կլիմայի հետազոտման համաշխարհային ծրագրերի և Եղանակի համաշխարհային ծառայության ստեղծումը:
ՀՕԿ-ի գործունեության հիմնական ուղղությունն է երկրներին օդերևութաբանական և հիդրոլոգիական ծառայությունների մատուցման հարցում աջակցությունը: Օդերևութաբանական համաշխարհային օրն անցկացվում է կլիմայի փոփոխությունների հնարավոր հետևանքների մասին լայն հանրության տեղեկացվածության բարձրացման նպատակով: Չէ՞ որ այսօր կլիմայի արագ փոփոխությունը ամենալուրջ էկոլոգիական խնդիրներից մեկն է, որին մարդկությունը բախվում է: Դա արտահայտվում է ոչ միայն եղանակի պայմանների փոփոխություններով, ջերմաստիճանի բարձրացմամբ/նվազմամբ, այլև կարող է բերել այնպիսի կործանարար աղետների, ինչպես ջրհեղեղներն են, երաշտները, ցունամիները և այլն:
Այդ պատճառով ամեն տարի այս օրը նվիրվում է ինչ-որ թեմային և անցկացվում են համապատասխան քարոզչական միջոցառումներ: Այսպես, տարբեր տարիներին այն անցկացվել է տարբեր կարգախոսերի ներքո, ինչպես, օրինակ, «Մեր ապագա կլիման», «Եղանակը, կլիման, ջուրն ու կայուն զարգացումը», «Բևեռային օդերևութաբանություն. գլոբալ ազդեցությունների հասկացությունը», «Մեր մոլորակի ուսումնասիրություն ավելի լավ ապագայի համար», «Եղանակը, կլիման և ջուրը՝ մեր ապագայի շարժիչ ուժերը», «Ամպերի հասկացությունը», «Պատրաստվում ենք եղանակին, հաշվի առնում կլիման», «Արևը, Երկիրն ու եղանակը» և այլն: