Անգլիայի եկեղեցին կդադարի ամենօրյա պատարագներ անցկացնել կորոնավիրուսի պատճառով
նգլիայի եկեղեցու քահանաները կդադարեցնեն ամենօրյա պատարագների անցկացումը` թագավորությունում նոր տեսակի կորոնավիրուսով վարակման դեպքերի աճի պատճառով: Այս մասին հայտարարել են անգլիացիների հոգեւոր առաջնորդ, Քենթբերիի արքեպիսկոպոս Ջասթին Ուելբին և Յորքի արքեպիսկոպոս Զոն Սենտամուն, փոխանցում է ՏԱՍՍ-ը:
«Կիրակնօրյա պատարագների, ինչպես նաեւ շաբաթվա ընթացքում հանդիպումներ անցկացնելու մեր սովորական պրակտիկան պետք է դադարեցվի: Սակայն սա չի նշանակում, որ Անգլիայի եկեղեցին փակում է իր դռները: Դա ամենեւին այդպես չէ»,- ասվում է քահանաներին ուղղված համատեղ նամակում: Արքեպիսկոպոսները նշում են, որ Անգլիայի եկեղեցին «առաջիկա ամիսներին ուրիշ եկեղեցի» կդառնա, իսկ դրա ծխականներն ու հոգեւորականները պետք է կենտրոնանան օգնության կարիք ունեցողների եւ աղոթքների վրա: Քահանաները նախկինի նման կկարողանան պատարագներ անցկացնել եւ պետք է փորձեն կիրակնօրյա պատարագները հեռարձակել համացանցի միջոցով: Անգլիական եկեղեցիները բաց կմնան, եւ բոլոր ցանկացողները կարող են այնտեղ աղոթել, հարսանեկան կամ թաղման արարողություններ անցկացնել: Միեւնույն ժամանակ, եկեղեցու առաջնորդները խորհուրդ են տալիս մարդկանց հետեւել կառավարության կարգադրություններին` առանց ավելորդ անհրաժեշտության զերծ մնալով ուրիշների հետ շփումից:
Անգլիայի եկեղեցու օրինակին են հետեւել նաեւ բրիտանացի մեթոդիստները: Անգլիայի եւ Ուելսի Կաթոլիկ եկեղեցու ղեկավար, Վեստմինստերի արքեպիսկոպոս Վինսենթ Նիքոլսը նույնպես հայտարարել է կիրակնօրյա պատարագներից հրաժարվելու պատրաստակամության մասին: Լոնդոնի քաղաքապետ, մահմեդական Սադիկ Խանը կոչ է արել ժամանակավորապես դադարեցնել աղոթքային հավաքները բրիտանական մզկիթներում:
Երեքշաբթի Միացյալ Թագավորության մի շարք թանգարաններ եւ կինոթատրոններ հայտնել էին աշխատանքը դադարեցնելու մասին: Այցելուների համար դռները փակել են նաեւ Լոնդոնի ազգային պատկերասրահը, Թեյթ պատկերասրահը եւ Լոնդոնի գիտության թանգարանը: Երեքշաբթի օրվանից դադարեցվել է Odeon, Cineworld, Picturehouse եւ Everyman կինոթատրոնների ցանցերի աշխատանքը: Միեւնույն ժամանակ, Transport for London պետական բրիտանական կազմակերպությունը հայտարարել է, որ մայրաքաղաքային հասարակական տրանսպորտը կսկսի գործել սահմանափակ ռեժիմով:
Երկրում նոր կորոնավիրուսով վարակման հաստատված դեպքերի թիվն աճել է ավելի քան մեկ քառորդով եւ հասել 1950-ի: Միեւնույն ժամանակ, Անգլիայի գլխավոր սանիտարական բժիշկ Քրիս Ուիթիի եւ բրիտանական կառավարության գիտական խորհրդատու Պատրիկ Վալանսի գնահատմամբ, դեպքերի իրական թիվը կարող է հասնել 55 հազարի: Երեքշաբթի օրվա դրությամբ, կորոնավիրուսի հետեւանքով մահացության դեպքերի թիվը հասել է 71-ի: