Ինչո՞ւ է ՏՄՊՊՀ-ն խմբագրություններից պահանջել հարկային հաշվետվություն. Պարզաբանում է Գեղամ Գևորգյանը
Այո, ՏՄՊՊՀ-ի պահանջը պարունակում է կոմերցիոն գաղտնիք եւ ՏՄՊՊՀ-ն այն մարմինն է, որ իրավունք ունի ստանալ թե առեւտրային, թե հարկային գաղտնիքներ: Այս մասին այսօր՝ մարտի 17–ին, լրագրողների հետ հանդիպման ժամանակ նշեց ՏՄՊՊՀ նախագահ Գեղամ գեւորգյանը՝ անդրադառնալով դիտարկմանը, որ ՏՄՊՊՀ-ն գրություն է ուղարկել խմբագրություններին՝ հաշվետվություն պահանջելով, որտեղ պետք է նշվի ամբողջ ներքին խոհանոցը, հարկային մանրակրկիտ հաշվետվություն, գովազդային քաղաքականության մանրամասների ներկայացում:
«Սա բնավ կապ չունի մամուլի գործունեության հետ: Գիտեք, որ մենք հայտարարել էինք, որ մեդիա եւ ինտերնետ դաշտում գովազդի շուկայի ուսումնասիրություն ենք անում, դա չի նշանակում որեւէ տնտեսվարող սուբյեկտի նկատմամբ վարույթ: Այսինքն ուսումնասիրությունը անում ենք՝ տեսնենք, թե շուկայում ինչ խնդիրներ կան, կառուցվածքը, մրցակցության աստիճանը հասկանանք: Դա առաջին հերթին ուղղված է մամուլի շահերի սպասարկմանը: Որովհետեւ եթե գովազդի դաշտը մրցակցային է, իսկ մամուլի հիմնական կամ միակ եկամտի աղբյուրը պետք է լինի գովազդը, դա նշանակում է, որ մամուլն ավելի մրցակցային կլինի:Հանգիստ եղեք, դա անում ենք հենց ի շահ մամուլի»,-հայտարարեց Գեղամ Գեւորգյանը: