Ապացուցվեցին բոլոր կասկածները, որ Արմեն Թավադյանը կալանավորվել է հատուկ «5-րդ ալիքին» վնասելու համար. Ալիքի տնօրեն (Տեսանյութ)
Կարող եմ ասել, որ ապացուցվեցին մեր բոլոր այն մտահոգությունները, կասկածները, որ հեռուստատեսության սեփականատերը կալանավորվել է հատուկ «5-րդ աիքին» վնասելու, աշխատանքները դժվարացնելու, մեր լրագրողներին անհարմար վիճակի մեջ դնելու համար: Այս մասին այսօր՝ մարտի 16-ին, լրագրողների հետ հանդիպման ժամանակ նշեց «5-րդ ալիք» հեռուստաընկերության տնօրեն Հարություն Հարությունյանը:
«Անցած 79 օրերը, երբ մեր սեփականատերը գտնվում էր կալանքի տակ, մեր հեռուստաընկերությունը շատ ծանր օրեր ապրեց, մեր լրագրողները շատ տհաճ իրավիճակների էին հանդիպում պարբերաբար: Ծանր օրեր ապրեցինք ոչ միայն բարոյական, այլ նաեւ այլ առումներով: Ընդհուպ պատրաստվում էինք դրամահավաքի մարաթն կազմակերպել, որպեսզի կարողանայինք մեր գոյությունը շարունակել: Փառք Աստծո, գործը դրան չհասավ»,-ասաց Հարություն Հարությունյանը:
Նրա խոսքով, բազմաթիվ առիթներով ինքն այդ հարցը բարձրացրել է. «Ես գոհ եմ եւ հպարտ եմ, որ ամենասկզբից տեղյակ եմ եղել, վստահ եմ եղել, որ քրգործը շինծու է, սարքվել է կամ քննիչի կամ ՀՔԾ-ի կողմից կարվել է, որ դժվարացնեն մեր հեռուստատեսության աշխատանքները»:
Նա ընդգծեց, որ հայտնվել ենք մի իրավիճակում, երբ լրագրողական եւ այլ ՀԿ-ները իրենց գործառույթները չեն իրականացնում, որովհետեւ տեղափոխվել են այլ դաշտ. «Նրանք փորձում էին աջակցել, նեցուկ կանգնել քննիչների աշխատանքներին, փոխարենը իրենց սատար են կանգնել լրատվամիջոցները»:
Հիշեցնենք, որ օրերս դատարանը բավարարեց «5֊րդ ալիք» ՀԸ սեփականատեր Արմեն Թավադյանի պաշտպանների ներկայացրած կալանքը երկարաձգելու դեմ բողոքը։ Դեկտեմբերի 24–ին «5-րդ ալիք» հեռուստաընկերության սեփականատեր Արմեն Թավադյանին կալանավորել էին կազմակերպված խմբի կողմից վկային կամ տուժողին սուտ ցուցմունք տալու նպատակով կաշառելու կասկածանքով: