Ռուսաստանը ժամանակավորապես արգելել է Իտալիայի քաղաքացիների մուտքը երկիր

Ռուսաստանի սահմանը Իտալիայի քաղաքացիների կողմից հատելու ժամանակավոր արգելքի որոշում է կայացվել՝ COVID-19 կորոնավիրուսի տարածման հետ կապված, հայտնում է ՌԻԱ Նովոստին։

«Ռուսաստանի ԱԴԾ-ն մարտի 13-ին, մոսկովյան ժամանակով 00 ժամ 00 րոպեից ժամանակավորապես դադարեցրել է ՌԴ սահմանով Իտալական Հանրապետության քաղաքացիների անցումը, որոնք ժամանում են ուսման եւ աշխատանքային գործունեության համար, ինչպես նաեւ մասնավոր, զբոսաշրջային եւ տրանզիտային նպատակներով»,- ասվում է փաստաթղթի տեքստում։

Բացի այդ, կդադարեցվի ՌԴ սահմանով արտասահմանյան քաղաքացիների եւ քաղաքացիություն չունեցող անձանց անցումը, որոնք ժամանում են Իտալիայից, գալիս են ՌԴ՝ ուսման եւ աշխատանքային գործունեության համար, ինչպես նաեւ մասնավոր, զբոսաշրջային եւ տրանզիտային նպատակներով, բացառությամբ Եվրասիական տնտեսական միության անդամ-պետությունների քաղաքացիների եւ օդանավերի անձնակազմերի, պաշտոնական պատվիրակությունների եւ անձանց, որոնք Ռուսաստանում բնակության իրավունք ունեն։

Ռուսաստանում մեկ օրվա ընթացքում գրանցվել է կորոնավիրուսի վեց նոր դեպք՝ չորսը Մոսկվայում, մեկական Կալինինգրադում եւ Կրասնոդարի մարզում, հայտնել է օպերատիվ շտաբը։ Այսպիսով, հիվանդացածների ընդհանուր թիվը հասել է 34-ի։