Մեծ Բրիտանիայի վարչապետ Բորիս Ջոնսոնն ու նրա ընկերուհի Քերի Սայմոնդսը նշանվել են ու երեխա են սպասում
Մեծ Բրիտանիայի վարչապետ Բորիս Ջոնսոնն ու նրա ընկերուհի Քերի Սայմոնդսը նշանվել են եւ երեխա են սպասում, հայտարարել է զույգի պաշտոնական ներկայացուցիչը, հաղորդում է BBC-ը:
Զույգն այդ մասին հայտարարել է մամուլի քարտուղարի միջոցով: Նրա խոսքով՝ զույգը շատ ուրախ է հանրությանը տեղեկացնել Սայմոնդսի հղիության մասին:
55-ամյա Ջոնսոնն ու 31-ամյա Սայմոնդսը Բրիտանիայի առաջին չամուսնացած զույգն է, որը բնակվում է Դաունինգ Սթրիթ 10 հասցեում՝ վարչապետերի նստավայրում:
Դեռ ավելին, վերջին 173 տարիների ընթացքում բրիտանացի վարչապետերի եւ նրանց տիկնանց (կամ ամուսինների) միջեւ այդպիսի մեծ տարիքային տարբերություն չի եղել. Քերի Սայմոնդսը 24 տարով փոքր է Բորիս Ջոնսոնից:
Ջոնսոնն ունեցել է երկու ամուսնություն: 1987-1993 թթ. նա ամուսնացած էր Ալեգրա Մոսթին Օուենի հետ: 1993 թվականին Ջոնսոնն ամուսնացել է Մարինա Ուիլերին:
2018 թվականի սեպտեմբերին Ջոնսոնն ու Ուիլերը հայտարարել էրն, որ վաղուց չեն ապրում միասին եւ գտնվում են ամուսնալուծության փուլում: Հենց այդ ժամանակ էլ տարածվել էին ասեկոսեները, որ քաղաքական գործիչը հանդիպում է Քերի Սայմոնդսի հետ, որն աշխատել է 2012 թվականին Լոնդոնում քաղաքապետի ընտրությունների ժամանակ նրա նախընտրական շտաբում:
Ջոնսոնն ու Ուիլերն ունեն չորս երեխա: ԶԼՄ-ների վարկածով՝ վարչապետը նաեւ ունի արտամուսնական կապից երեխա, որի մայրն արվեստագետ Հելեն Մաքինթայրն է:
Ինքը՝ Ջոնսոնը, 2019 թվականին ռադիոշոուի ժամանակ հրաժարվել է ուղիղ պատասխանել հարցին, թե քանի երեխա ունի: