«Արցախը երբեք չի լինելու Ադրբեջանի կազմում». Սերժ Սարգսյանը խոսել է դատարանի բակում

ՀՀ երրորդ նախագահ Սերժ Սարգսյանը քիչ առաջ ժամանեց դատարան եւ մինչեւ դատարան մուտք գործելը՝ բարձրախոսով շնորհակալություն հայտնեց իր աջակիցներին։

Նշենք, որ Սերժ Սարգսյանին աջակիցները դիմավորեցին ծափահարություններով եւ «նախագահ»՝ վանկարկելով։

«Սիրելի հայրենակիցներ, սիրելի ընկերներ, սիրելի աջակիցներ շնորհակալ եմ, որ եկել եք ինձ սատարելու, իսկ մեծ հաշվով եկել եք պաշտպանելու արդարադատությունը։ Խնդրում եմ իմ երախտագիտությունը հայտնել ձեր մերձավորներին, հարազատներին, որոնք չեն փորձել ձեզ համոզել այս անբարենպաստ եղանակին մնալ տանը, ինչպես ասում են՝ շառ ու փորձանքից հեռու։

Հաշվի առնելով եղանակային պայմանները եւ այն հանգամանքը, որ հույս կա՝ Հայաստանում դեռեւս կան դատավորներ, ում համար արդարադատությունը վեր է ամեն ինչից, ուղիղ այնպես, ինչպես ինձ համար, ձեզ համար, հայ ժողովրդի մեծամասնության համար»,-ասաց երրորդ նախագահը։

Սերժ Սարգսյանը նշեց, որ Լեռնային Ղարաբաղի անկախությունը վեր է ամեն ինչից, եւ խնդրեց իր աջակիցներին՝ վերադառնալ տուն, զբաղվել իրենց առօրյա հոգսերով՝ չմոռանալով Հայաստանի Հանրապետության անվտանգության մասին.

«Ես աշխարհի ամենաբարձր ամբիոններից պարբերաբար հայտարարել եմ, հիմա էլ կրկնում եմ՝ Լեռնային Ղարաբաղը երբեք չի լինելու Ադրբեջանի կազմում։ Սա եղել է իմ կյանքի գերագույն նպատակը եւ այն ինձ ուղեկցելու է մինչեւ վերջ եւ ամենուր»։

Նշենք, որ դեռևս դատական նիստից երկու ժամ առաջ, չնայած անձրևոտ եղանակին, դատարանի բակում հավաքվել էին Սերժ Սարգսյանի բազմաթից աջակիցներ։ Դատարանի բակ են եկել Հանրապետականներ, ԱԺ նախկին նախագահներ Արա Բաբլոյանն ու Գալուստ Սահակյանը, նախկին պատգամավորներ Ռուբեն Հայրապետյանը, Արկադի Համբարձումյանը, Արայիկ Գրիգորյանը, Էդուարդ Շարմազանովը, Արմեն Աշոտյանը, Սերժ Սարգսյանի եղբորորդին՝ Հայկ Սարգսյանը, եւ բազմաթիվ այլ քաղաքացիներ։

Նշենք, որ դատավոր Վահե Միսակյանի նախագահությամբ մեկնարկել է ՀՀ երրորդ նախագահ Սերժ Սարգսյանի, «Ֆլեշ» ընկերության սեփականատեր Բարսեղ Բեգլարյանի, նախկին գյուղնախարար Սերգո Կարապետյանի, գյուղատնտեսության նախկին փոխնախարար Սամվել Գալստյանի եւ նույն նախարարության Բուսաբուծության վարչության պետ Գեւորգ Հարությունյանի գործով առաջին դատական նիստը։

Նրանցից 4-ին՝ Սերժ Սարգսյանին, Բարսեղ Բեգլարյանին, Սամվել Գալստյանին եւ Գեւորգ Հարությունյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով (առանձնապես խոշոր չափերով յուրացումը կամ վատնումը կազմակերպել, դրդելը, օժանդակելը), իսկ Սերգո Կարապետյանին՝ 179-րդ հոդվածի 3-րդ մասի 1-ին կետով (առանձնապես խոշոր չափերով յուրացումը կամ վատնումը):

Ըստ ՀՔԾ հաղորդագրության՝ Սերժ Սարգսյանի կազմակերպմամբ եւ Բարսեղ Բեգլարյանի դրդմամբ, Սամվել Գալստյանի ու Գեւորգ Հարությունյանի օժանդակությամբ, Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը:

Սերժ Սարգսյանն իրեն առաջադրված մեղադրանքը չի ընդունում։ Նրա պաշտպան Ամրամ Մակինյանը պնդում է, որ մեղադրանքը շինծու է։ Ըստ մամուլի տեղեկությունների, մեղադրանքի հիմքում Սերգո Կարապետյանի ցուցմունքն է։ Նա եւ Սերժ Սարգսյանն առերեսվել են։

Դատավարության մեկնարկի օրը ՀՀԿ–ն տարածել է հայտարարություն, ըստ որի, գործն ուղղորդված է եւ պատվիրված, ունի քաղաքական շարժառիթներ, ինչի մասին վկայում է այն, որ գործը հարուցվել է «կասկածելի հանգամանքներում կորզած, ընդամենը մեկ ցուցմունքի հիման վրա»։

Հայտարարությունում նաեւ ասվում է, որ նման քայլերով իշխանությունները նպատակ ունեն շեղել հայ ժողովրդի ուշադրությունը օրեցօր սրացող ներքին եւ արտաքին բազմաթիվ այլ խնդիրներից. «Հատկանշական է, որ այս դատավարության մեկնարկը տեղի է ունենում իշխանությունների՝ հանցավորության աստիճանի ապաշնորհ անվտանգային եւ դիվանագիտական գործունեության ֆոնին՝ Արցախյան բանակցությունների շուրջ ստեղծված համատեքստում»: