«Շերեմետևո» օդանավակայանի տրանսպորտային ոստիկանները բացահայտել են Հայաստանի քաղաքացուց 40 հազար դոլարի գողությունը

Ռուսաստանի ՆԳՆ «Շերեմետեւո» օդանավակայանի Գծային վարչության հերթապահ մաս է դիմել Հայաստանի Հանրապետության քաղաքացուհին՝ խնդրելով օգնել իր գոտեպայուսակի որոնմանը, որը թողել էր Լոս Անջելես-Մոսկվա չվերթի օդանավում, որի մեջ եղել է ԱՄՆ 40 հազար դոլար:

ՌԴ ՆԳՆ Կենտրոնական դաշնային շրջանի Տրանսպորտային վարչության մամուլի ծառայությունից հայտնել են, որ տեղեկությունը ստանալուց հետո տրանսպորտային ոստիկանության աշխատակիցներն անմիջապես գնացել են դեպքի վայր, որտեղ այդ ժամանակ հենց նոր էին սկսել սրահը մաքրել, սակայն մոռացված պայուսակն արդեն այնտեղ չէր:

Օպերատիվ-հետախուզական միջոցառումներ անցկացնելու ժամանակ ուրիշի ունեցվածքի հափշտակմանը հանցակցելու կասկածն ընկել է Երեւանից ընտանեկան զույգի վրա, որը նստած էր եղել տուժածի կողքին: Ուղեկցորդների խոսքով՝ այն բանից հետո, երբ պայուսակի տերը ուղղվել է դեպի ելքը, նրա հարեւանները որոշ ժամանակ մնացել են իրենց տեղերում: Նրանց տվյալները շուտով պարզվել են, եւ Հայաստան չվերթին գրանցվելիս կասկածյալներին բռնել են ու ուղեկցել հերթապահ մաս: Կինը հազիվ էր շարժվում՝ հղում անելով առողջական վիճակին, բայց պարզվել է, որ նրան խանգարում էին նորմալ քայլել մարզակոշիկների մեջ թաքցրած թղթադրամների կույտերը: Փողի երկրորդ մասը սռգարվվել է նրա ամուսնու բաճկոնի ներքին գրպանից:

Այս քաղաքացիների դեմ քրեական գործ է հարուցվել ՌԴ ՔՕ 158-րդ հոդվածի 4-րդ մասով նախատեսված հանցագործության համար (Առանձնապես խոշոր չափի գողություն): Կասկածյալները ձերբակալվել են ՌԴ Քրեադատավարական օրենսգրքի 91-92-րդ հոդվածների համաձայն: