«Մենք ունեցել ենք ինքնասպանությունը կանխելու 8 դեպք». ԶՈՒ ԳՇ պետ
Մենք ունեցել ենք ինքնասպանությունը չավարտած դեպքեր, երբ ինքնասպանության փորձ են արել, բայց ավարտին չեն հասցրել: Այս մասին, այսօր՝ փետրվարի 18-ին, ԱԺ-ում լրագրողների հետ հանդիպման ժամանակ նշեց ՀՀ զինված ուժերի գլխավոր շտաբի պետ Արտակ Դավթյանը:
«Եվ ծնողները, եւ իրավապահ մարմինները կարողանում են հասկանալ, թե պատճառը որքանով է կապված ծառայության հետ, բանակի հետ, որքանով այլ խնդիրների հետ:
Դրանց մի մասը նեղ անձնական բնույթի տվյալներ են պարունակում, չէի ցանկանա այստեղ ներկայացնել»,-ասաց նա՝ հավելելով, որ 2015-ի հունիսից ինքնասպանությունը կանխելու 8 դեպք է եղել:
Դիտարկմանը, որ կա տեսակետ, որ բանակում մահվան ելքով միջադեպերը կապված են նաեւ նրա հետ, որ իրական մեղավորները չեն պատժվում, ԳՇ պետն ասաց. «Եթե որեւէ սպա կամ պաշտոնատար անձ նախկինում հանցագործություն է կատարել եւ կոծկել են, դա, շատ ներողություն, առաջին հերթին կհարվածի բանակին, որովհետեւ նույն հաջողությամբ ինքը վաղը երկրորդը, երրորդը կգործի: Իհարկե, ամեն մի զոհի կամ մահվան դեպքի հետ կապված: Ես համենայնդեպս, չգիտեմ, եթե կան կոնկրետ փաստեր, իրավապահ մարմիններին տրամադրենք, թող զբաղվեն: Ես քրեական գործերի հետ կապված ոչինչ չեմ կարող պատասխանել»:
Ըստ Դավթյանի՝ բանակում արտոնյալների հետ կապված աշխատանքներ տարվում են, հաշվառումներ կան և օպերատիվ ճանապարհով ստացած, և զորամասերում աշխատողներ: «Ես ԱԺ հանձնաժողովերի հետ հանդիպման ժամանակ որոշ դեպքեր նշել եմ, չեմ ուզում, որ բացահայտենք այն ռազմավարությունը, որը տանում ենք»,-ասաց նա:
Հարցին, թե որո՞նք են խաղաղ պայմաններում զոհերի պատճառը, ինչ աշխատանք է տարվում, որ նման բաներ չլինեն, նա արձագանքեց.
«13 զոհերից 8-ի պատճառը հստակ գիտենք եւ այդ ուղղությամբ զբաղվում ենք. 4-ը հիվանդության հետ է կապված, 4-ը՝ դժբախտ պատահարի: Ընդ որում, դժբախտ դեպքից 3 զոհերը ձնահոսքի տակ ընկնելու պատճառով է:
Մնացած դեպքերում, այդ թվում ինքնասպանության հասցնելու դեպքերին, բոլորի վերաբերյալ հարուցված են քրեական գործեր, եւ դրանց շրջանակներում բոլոր հարցերի պատասխանները կլինեն:
Մեր մասով, որտեղ մենք հայտնաբերել ենք ծառայության հետ կապված բացթողումներ, բացի կոնկրետ պատիժներից, ամեն շաբաթ շրջաբերականներ ենք ուղարկում ամբողջ զինված ուժերի հրամանատարական կազմին, որտեղ տեղեկացնում ենք կատարված դեպքի նկարագիրը, ծնող պատճառները, կամ կարգադրական, կամ առաջարկի կարգով, որ իրենք տեղերում որոշումներ կայացնեն, որպեսզի այդ դեպքերը բացառվեն: Իսկ կոնկրետ դեպքերի դեպքում 1-2 օրվա ընթացքում ըստ նյութերի տալիս ենք, չենք սպասում, որ ամբողջական պատկերը լինի: Տեսանք, որ կոնկրետ թերությունն առկա է, շտապ նշվում է, որ դա տեղում վերացվի»:
Ինչ վերաբերում է Ռազմական ոստիկանության պետ Արթուր Բաղդասարյանին, նա նշեց. «Մենք համագործակցում ենք ռազմական ոստիկանության հետ և ես չեմ կարող ՌՈ պետի գործունեության հետ կապված գնահատականներ տալ»:
Անդրադառնալով իր եւ պաշտպանության նախարար Դավիթ Տոնոյանի հարաբերություններին՝ Դավթյանն ասաց, որ Գլխավոր շտաբի պետը ենթարկվում է պաշտպանության նախարարին և որևէ տարաձայնություն համատեղ աշխատանքում չի եղել՝ չհաշված աշխատանքային քննարկումները, կարծիքները, որը շատ հաճախ ներկայացվում են որպես խիստ հակասություններ:
Նրա խոսքով, ինքը չի կարող ամեն անգամ տեսակետների տարբերություն առաջանալու դեպքում հրաժարական տալ. «Եթե սկզբունքային խնդիրներ առաջանան, ես կարող եմ հրաժարական տալ, որեւէ խնդիր չեմ տեսնում:
Ինչ վերաբերում է առօրյա խնդիրների կատարմանը, նախարարը նախքան որոշում կայացնելը կամ քաղաքականություն մշակելը, բնական է, որ խորհրդակցում է, Գլխավոր շտաբը ներկայացնում է իր տեսակետը, մոտեցումները, որը շատ հաճախ կարող է չհամընկնել վեեւրջնական որոշման հետ: Դա նորմալ է, որովհետեւ քաղաքականության առումով պատասխանատուն պաշտպանության նախարարն է»,-ասաց նա:
Բանակում քրեական ենթամշակույթի մասով պատասխանները պետք է տրվեն քրեական գործի շրջանակներում: «Ընդհանուր գլոբալ մեծ առումով նման տարրեր, իհարկե, կան բանակում, ինչպես նաեւ հասարակության մեջ: Չի կարող հասարակությունում դա լինել եւ բանակում չլինել: Իհարկե, բավականին դաշտ ունենք աշխատելու»,-ասաց Դավթյանը: