Մինչև 2024 թվականը նախատեսվում է ևս 10 մշակաբույս ներառել գյուղատնտեսական ապահովագրության ծրագրում
Մինչև 2024 թվականը նախատեսվում է ընդլայնել գյուղատնտեսական ապահովագրության ծրագիրը, եւ եւս 10 մշակաբույս ներառել դրանում, այդ թվում անեւ` բանջարեղենային: Այս մասին փետրվարի 17-ին լրագրողների հետ հանդիպման ժամանակ հայտարարեց ՀՀ գյուղատնտեսության նախարարության գյուղատնտեսական ծրագրերի մշակման, ռեսուրսների օգտագործման եւ համագործակցության զարգացման վարչության պետ Իրա Փանոսյանը` ներկայացնելով գյուղատնտեսության ոլորտում ապահովագրության համակարգի ներդրման ուղղությամբ փորձնական ծրագրի իրականացման ընթացքը՝:
Ըստ նրա` հետաքրքրվածությունը մեծ է, բայց անհրաժեշտ է բարձրացնել վստահության մակարդակը՝ հաշվի առնելով, որ ծրագիրը նոր է: «Եթե տնտեսվարող սուբյեկտը մինչեւ փետրվարի 21-ը կապահովագրի ինչպես «կարկուտի ու հրդեհի», այնպես էլ «գարնանային ցրտահարության» ռիսկերը, ապա պետական սուբսիդավորումը կարող է հասնել մինչեւ 70 տոկոս: «Կարկուտի եւ հրդեհի համար» առանձին պայմանագիր կնքելու դեպքում` մինչու 50 տոկոս, իսկ առանձին «գարնանային ցրտահարությունների» համար` մինչեւ 60 տոկոս»,- նշեց նա:
Իրա Փանոսյանը հավելեց, որ, վիճակագրության համաձայն, 6 տարվա ընթացքում հողօգտագործողները 110 միլիարդ դրամի վնաս են կրել, ընդ որում, համապատասխան փոխհատուցում չեն ստացել: «Դեղձի, խնձորի, խաղողի, ծիրանի, ցորենի եւ գարու համար պետական փոխհատուցման նախորդ համակարգն այլեւս չի գործի, այսինքն, խոսքն այն մշակաբույսերի մասին է, որոնց համար նախագիծն արդեն գործում է: Արարատյան եւ Արմավիրի մարզերում նշված մշակաբույսերի մասով տնտեսվարող սուբյեկտները նախորդ համակարգով գարնանային ցրտահարությունների դեպքում փոխհատուցում չեն ստանա: Խաղողի եւ ծիրանի մասով կարկուտի եւ հրդեհի դեպքում փոխհատուցման նախկին համակարգը չի գործի Արարատի, Արմավիրի, Կոտայքի, Տավուշի, Արագածոտնի, Վայոց ձորի մարզերի հողօգտագործողների համար: Արարատի եւ Արմավիրի մարզերում նախորդ համակարգը չի գործի նաեւ գարնանային ցրտահարության դեպքում: Եթե խոսքն այն մշակաբույսերի մասին է, որոնք ընդգրկված չեն ծրագրի մեջ, ապա կգործեն հին նորմերը»,- եզրափակեց պաշտոնյան: