Թրամփի «դարի գործարքը» օկուպացիոն նախագիծ է. Էրդողան

Թուրքիայի նախագահ Ռեջեփ Թայիփ Էրդողանը կարծում է, որ Մերձավոր Արևելքի կարգավորման հարցում ԱՄՆ նախագահ Դոնալդ Թրամփի առաջարկած «դարի գործարք»-ը օկուպացիոն նախագիծ է: Թուրքիայի ղեկավարը նման կարծիք է հայտնել ուրբաթ օրը Պակիստանի խորհրդարանում ունեցած ելույթի ժամանակ, փոխանցում է ՏԱՍՍ-ը:

«ԱՄՆ-ի խաղաղության պլանը խաղաղության նախագիծ չէ Մերձավոր Արևելքի համար,- մեջբերում է Էրդողանին պակիստանյան Doon թերթը:- Սա օկուպացիայի նախագիծ է»: «Վերջին շաբաթների ընթացքում ԱՄՆ վարչակազմն այս պլանը «դարի գործարք» էր հայտարարել, մենք (Թուրքիա) հայտնել ենք մեր կարծիքը բռնակցման այս ծրագրի վերաբերյալ, - ավելացրել է նա:- Մենք ամբողջ աշխարհին հայտնել ենք, որ չենք թողնի Տաճարի լեռը իսրայելցի զավթիչներին»:

Հունվարի վերջին Թրամփն Իսրայելի վարչապետ Բենյամին Նեթանյահուի հետ համատեղ մամուլի ասուլիսին հայտարարել էր, այսպես կոչված, դարի գործարքի առանցքային դրույթների մասին`՝ պաղեստինաիսրայելական խաղաղ կարգավորման պլանի, որը հիմնված է երկու պետությունների փոխադարձ ճանաչման վրա: ԱՄՆ-ն առաջարկում է Գազայի հատվածից եւ Հորդանան գետի Արևմտյան ափից բաղկացած պաղեստինյան տարածքն անխզելիորեն կապել արագընթաց տրանսպորտային օղակներով, իսկ Արևելյան Երուսաղեմը ճանաչել արաբական պետության մայրաքաղաք:

Միևնույն ժամանակ, ԱՄՆ նախագահը Երուսաղեմն անվանել է Իսրայելի անբաժանելի մայրաքաղաք եւ հայտարարել է հրեաների բնակավայրերը որպես Իսրայելական տարածք ճանաչելու Վաշինգտոնի մտադրության մասին: Որպես խաղաղության գործընթացի պայմաններ` Ամերիկայի նախագահը նշել է, որ Պաղեստինի իշխանությունները պետք է հրաժարվեն աջակցել «ՀԱՄԱՍ» արմատական շարժմանը Գազայի հատվածում, ինչպես նաեւ պետք է հրաժարվեն զինված պայքարի մեթոդներից: Կարգավորումը առաջ տանելու համար Միացյալ Նահանգները պաղեստինցիներին 50 միլիարդ դոլար ներդրում են առաջարկում: