Հայաստանին ազգային ավիափոխադրող հարկավոր է, թե՞ ոչ. պարզաբանել է Քաղավիացիայի կոմիտեի ղեկավարը (Տեսանյութ)
Հարցը նրանում չէ` Հայաստանին ազգային ավիափոխադրող հարկավոր է, թե՞ ոչ, այլ մրցակցային կառույց ստեղծելու մեջ է: Այս մասին փետրվար 13-ին ՀՀ Ազգային ժողովի նիստում «Հայաստանի Հանրապետության եւ Հորդանանի Հաշիմյան Թագավորության կառավարությունների միջեւ համաձայնագրի» վավերացման հարցի քննարկման ժամանակ ասաց ՀՀ Քաղաքացիական ավիացիայի կոմիտեի ղեկավար Տաթեւիկ Ռեւազյանը` պատասխանելով «Բարգավաճ Հայաստան» կուսակցության պատգամավոր Միքայել Մելքումյանի հարցին:
Նա, մասնավորապես, նշեց, որ բոլորը կցանկանային թռչել ազգային ավիափոխադրողի ինքնաթիռներով, բայց անհրաժեշտ է հաշվի նստել իրականության հետ: «Արդյո՞ք մենք պատրաստ ենք ունենալ ավիափոխադրող, որը թռչելու է դատարկ ինքնաթիռներով: Պատրաստ ենք արդյո՞ք փակել այդ ծախսերը: Առաջին հերթին անհրաժեշտ է պատասխանել այս հարցերին»,- ասաց Ռեւազյանը:
Ընդ որում, նա նշեց, որ եթե նայենք, թե ինչ է տեղի ունենում աշխարհում այս ոլորտում, կարող ենք տեսնել, որ մրցակցությունն ուժեղանում է: «Հաջորդ հինգ տարվա ընթացքում Եվրոպան Ամերիկայի նման կդառնա այն իմաստով` ավելի քիչ ավիաընկերություններ կլինեն: Եթե ցանկանում ես մրցակցել, ապա պետք է 200-300 ինքնաթիռ ունենաս»,- պարզաբանեց Տաթևիկ Ռևազյանը: